13. November 2023 23:24

678 Ōmandokorochō, Shimogyo Ward, Kyoto, 600-8413, Japan | 7°C

Konnichiwa! 🗾

🌍 Trip Übersicht:

🏨 Ungerkunft    (Hotel / AirBNB / Hostel)

👁️Erschte Idruck:
Ach diese Japaner, alles muss ganz genau und nach ihren Abläufen gehen.

Ds Wätter tuet langsam chley uf.

👜 G’machti Sache
Zmorge g’gässe, mit em Bus g:fahre, täxelet,

👀 G’sehni Sache
E wunderschöni Parklandschaft im Ginkaku-ji-Tämpel. Tuusig Buddhastatue

🍽️ G’gässni Sache
Weschtlechs Zmorge, e Riis mit Shitakepilze, e halbe Pancake

🗓️ Der hütig Tag verzellt mit zäh Bildeli

Der Reiseleiter het scho vorg’warnet. Ds Zmorge gieng me besser uswärts gah nh. Me heig nume am früeche Morge e Chance.

Am sächsi erwachet am Viertel vor siebni bim Zmorge. Das geit aber hie nid so eifach. Ds Zmorge wird separat abg’rächnet. Dass me es Kafi ‹berchunnt muess me zersch es Ticket, e Bon gah choufe. Dä überchunnr me bi der Rezeption. Dert muess me zersch d Zimmercharte zeige, de d Rumnummere säge u z wievielt me isch. De choschtet’s 2400 Yen. Nachhär wird d Charte, der Bon g’schribe, vo Hand. Dä Bon wird de verschnitte u ne Teil i re Schublade versorget. Der ander Teil ‹berchume ig. Da dermit muess i zum Zmorgeruum u ne dert abgäh. De wirde n i zu me freie Platz begleitet. Ersch itz darf i gah es Kafi uselah…

Em achti g’hört d Lobby de Amerikaner! Uää! Isch das es Volk, i bildet, vorlut u sälbschtverliebt. Me chönnt meine, si heige d Wält g’chouft. – Ja de, itz si si abg,reist.

Z zwöit hei mer is hüt vom ordentleche Programm abg’mäldet. Geschter Abe hei mer beschlosse, mer gönge hüt zum Ginkaku-ji-Tämpel.

Öppis nah de nüne starte mer vom Hotäl u lande de afe einisch im Kafi näbedranne. Nach me erschte Pöiseli fahre mermit em Bus Nr.5 i Richtig Tämpel. Dasisch aber nid so ribigslos g,gange. Mer wüsse ja nid mit welem Bus u i weli Richtig. D Hilfsbereitschaft vo de Japaner isch gränzelos! I re erschte Rundi hilft e junge Japaner mit paar Wort änglisch (u schickt üs uf die falschi Strassesite). Dert frage mer im Igang vo re Bank. Die chöi o nid alli Wält änglisch. E Frou u ne Ma beratschlage;- schlussäntlige bringt är üs de zur Busstation uf der andere Strassesite u seit, wele Bus näh.

Me stell sech das Schouspiel z Bär vor. Zwöi Japaner wei bi re UBS-Filiale der Bus zum Rosegarte näh. Wele vo de Bankangestellte würd se zum Bus bringe?

Nu ja, mer chöme bim Tämpel a, allerdings het es viel ganz schöni Lädeli i der Nechi.

Ou es ganz fein’s Reschturant het es. Mer ässe hie Z’mttag im NoaNoa. I ha es spitzemässig’s Pilzrisotto.

Der Tämpelbezirk isch idrücklech u mer spaziere dür ds ganze G’länd. Das duuret ziemli.

Mit em Taxi fahre mer de zum Nationalmuseum. Das isch zwar zue, aber g’rad dernäbe isch der Tämpel mit de tuusig Buddhas. Wär mi kennt, weiss o vo mine Vorbehalte. I ha Respäkt vor em Handwärch u em künsvhtlerische Usdruck aber der religiös Teil isch Usdruck vo Macht u Anhängigkeit.

Uf em Wäg zum Hotäl zrügg tüe mer no einisch käfele. Im Café Amazon chehre mer i u wärme n is uf. Chley später hei mer Glück u finge wieder es Taxi. Vor de füfe si mer im Hotäl. I mache Büro u gah glii i ds Bett.