6. August 2022 21:40

Rukankyläntie 17, 93825 Kuusamo, Finnland | 16°C

Es isch immer wiedér e Erfahrig, em Morge früech mit em Zug.z fahre. Ds Dori bringt mi em sächsi uf Buchsi

Vo dert fahre ig bis Biel u dernah de uf Züri. Es brucht e Bitz Geduld, wiu e all Pot haltet. Derfür vernimmt me die Nöischte.

Der Kolleg rächterhand het verschlafe u muess sech telefonisch bi sim Chef entschuldige. Das gieng no, aber er het hüt der erscht Arbeittag bi der Securiti.

E Gruppe jungi Froue hocke zwöi Abteil wyter. Die wei äuä i Süde. Was die alles braschte mit ihrne höche, gäägige Stimme: d Fründe, d G’sichtscreme, ds Programm, d Tröim, d Chleider, d Chilchezueg’hörigkeit, … I re Lutsterchi, dass der Wagon unterhalte isch. Es Abteil wyter het es Tätle. Die hei ganz angeri Theme. Mi Nachber isch e jungzwungene Vierzger mit Löcher i de Hosebei. I frage mi, ob das muess sy. Es wott so cheibe nid passe. Ab zwänzgi sötte Löcher i de Hose nümm modeschi Merkmal sy.

Es isch chüel im Zug i muess mi Pulli usegrüble.

U de bi n i z Züri Flughafe, – notabene z früech. Ja de haut, i gibe mis Gepäck uf. D Bordcharte ha n i scho. Es het Lüt, aber i ha scho Schlimmers erläbt D Reiheli bewege sech ömu. Bim Sicherheitscheck duuret’s länger, aber i chume ömu o dra.

U itz höckle n i i der Center Bar u trinke es Kafi; – mit em Händi b’stellt u zahlt …😉

Werum müesse chlyni Ching flüge? Werum müesse si uf me eigete Sitz hocke u a bunde sy? I mire Umgabig het es g’rad zwee so Schreihäls, wo da demit gar nid i verstande si.

D Eltere wüsse sech fasch nid z hälfe. Eifach säge ’so isch es› nützt nüt. D Chind si g’wanet ihre Will z bercho. Also schreie si, d Eltere nähme se zue sech, verteile Spili u Ässe … Zwänge u brüele bringt’s! Tja.

Helsinki het e grosse Flughafe un es isch für mi nid alles logisch (g’sy). Nach me Sandwitch ‹ The Italian› sueche n i g’müetlech ds Gate 8. Das isch aber de gaaanz wit usse. I der Zwüschezyt ha n i mi Gruppe troffe: Siuberfischli, mit eir Usnahm.

Itz höckle n i i re chlyne Propällerflugere. Es isch wahnsinnig lärmig u äng. D Durchsage si für mi nid chinesisch, sondern finnisch. Es geit verby.

Vo Rovaniemi (Sami lässt grüssen) geit d Reis im Car wyter bis Ruka. Wahnsinn, zwo drüviertel Stung dür die bewaldeti Äbeni tuckere. G’seh tuet me wehni/ -es schiffet.

Im Hotäu git es zersch z ässe: drü bis vier. Nachhär isch Zimmerbezug. Es isch zwänzg vor zwölfi. Guet Nacht.