31. März 2023 12:49

Hauptstrasse 95, 3255 Rapperswil, Schweiz | 2°C

Kapitel 4

Nach ere wytere Halbstund chunnt der Herr Sun mit Taxi. Der Taxichauffeur (über sächzgi) fahrt zügig zueche un ig wirde i g’lade. Es luschtigs G’spann die zwee. U es wird viel g’lachet.

Der Herr Sun isch so um die füfzg. Er isch eine us em Süde. Sini Familie isch vom Chrieg starch betroffe g’sy. Eigetli weni Grund zum Lache. Aber: Vietnamese lache gärn u viel.

Der Täxeler fahrt wie wild. I de Ortschafte sött e G’schwindigkeit vo 30 bis 40 i g’halte wärde. Der Tacho zeigt öppis angersch.

Nach paar Kilometer macht e Polizischt mit Laserpischtole Kontrolle. Der Busfahrer vor üs wird useg’no.
Der Herr Sun erklärt, dass der Taxifahrer mit de Polizischte «good friend» sigi. Die mache ihm nüt; – u beid lache.
Mer fahre zu re Ample, rächts isch d Töffspor frei. Der Taxifahrer brucht se u fahrt, wo’s de grüen wird allne um d Ohre.

Guet, er weiss was er macht. Mi choschtet die Fahrt e Million Dong u nach ere wytere halb Stund bi n i wieder bi der Gruppe i der Raschtstätt. I wirde mit G’sang (Bild), Fahne u me Triumpg’hüül begrüesst. O ne Omelette hei si für mi i packt.

Es geit wyter gäge Saigon zue u ig ha es Erläbnis g’ha, wo n i no lang dra dänke wirde.

Zrügg zur Vietnamreis 2023.