31. März 2023 11:30

Hauptstrasse 95, 3255 Rapperswil, Schweiz | 5°C

Kapitel 2

Das muess d Rach vo de Tämpelgötter sy. – I säge der Combox, ob si nid öppis ds Cái Bé vergässe heige und i wär froh für ne Rückruef, für abzmache wie n ig bis Saigon chöm.

Zwüschezytlech isch wieder lüter um mi. Nöii Chunde si acho u dene wird haarchlyn vietnamesisch erklärt, was los isch. Es chöme nöii Vorschläg u ig warte.

Zwüschezytlech düset vor üs halb Vietnam uf Töffe düre. Laschtwäge u -li näbscht Pärsoneouto mache der Mix perfekt.

Mis Telefon lütet, es wird churz still. D schwizer Reiseleitere isch dranne (es lachet lut hinger mer) i verzelle no einisch mi Situation u frage, öb i mit em Taxi söll nache cho. Si meint, si wöll die Sach mit em lokale Reiseleiter bespräche. Si lüti zrügg.

Natürli geit ds Lafere u Lache wieder los. Füf Minute später berchumi B’scheid, der Herr Sun chöm mit em Taxi zrügg u reich mi. Es göng aber no e Viertelstund, de sige si uf me Raschtplatz. Währed em Mittagässe chömm der Herr Sun.

I warte.

Der Phan muess los, wieder mit em Töff gah Gäld verdiene. D Madame isch ir Zwüschezyt die Einzegi, wo no da isch. O si packt zäme u d Budeb’sitzere ligt wieder uf em Mätteli.