31. März 2023 10:36

Hauptstrasse 95, 3255 Rapperswil, Schweiz | 8°C

Kapitel 1

Dusse luege n ig zum Bus. Öppe hundert Meter wyter fahrt er i Richtig Saigon! Dä Sprint ligt nümm drinn.

I stah da wie g’chläpft. Was itz?

Uf der angere Strassesite lachet d Huetverchöifere luthals. Si braschtet druflos u ig verstah ke Wort. Si zeigt em Bus nache u lachet wieder vo ganzem Härz.

I cha nid angersch u lache mit. Si winkt u i gah über d Strass. De chunnt e ältere Herr mit Töff derzue, si verzellt u beidi lache u ig mit.

Si redt nume paar Wort u är nid viel meh änglisch.

Mer göh zäme zu me Kafistand/Resturäntli. D Inhabere ligt uf me Mätteli u döset. D Huetverchöifere stellt sech als Madame Bol vor u är heisst Phan.

Ig choufe afe einisch es Wasser u probiere mi z fasse.

Der Phan meint, ig chönn ja e Töff miete bis Saigon. I winke ab. Är meint, är würd mi fahre…

Innerlech hoff i, dass die im Bus merke, dass ig nid derby bi. Villicht chöme si zrügg. Schliessli ha m i ja g’seit, i sig bim Bus. I cha nid wäg. Aber, – d Zyt vergeit.

Der Phan schlaht vor, der Bus z näh, – i winke ab. Übrigens, es isch keh Sekunde ruehig, die beide Froue u der Phan schnädere u lache u schnädere u lache u …

Telefon: geit nid, eSIM abg’loffe. I aktiviere d schwizer SIM. So, itz chume n i wieder i ds Internet. I lade us der Cloud d Ungerlage zur Reis ache. Dert finge n i ds Handynummero vo der Reiseleitig. Alles wird lut kommentiert u belachet. Wo m i de wähle, wird es still. Es lütet u d Combox nimmt ab.