«Hola querida Suiza!»
Informe diario:
desde: 20.11.24
en: Tamarindo Dirià Beach Resort
una dos tres fotos del dia:
 |
 |
 Jedi Wohnig het e eigete Stromzähler uss am Hus |
que vale la pena escribir:
Nöie Tag, nöis Glück. Der Tag faht am sächsi im Wasser a. D Brüllaffe si o scho wach. I wächsle no der Pool will i ganz allei im Wasser bi. Niemer da. Es isch Samschti, de wird usg’schlafe.
Bim Zrüggah i ds Zimmer fählt mi Keycard, Schmarre! Also i de Becki gah sueche. I finge se de, aber die geit nid. No einisch sueche, de finge n i am Beckibode zwo näbnang. Juii, eini geit.
Uf em Wäg zum Zmorge bringe n i zwo Charte zur Reception. D Frou dert het ds G’füehl, i wöll uschecke.
Ds Zmorge fallt wie gäng sehr läng us. I muess ziemli viel usprobiere. Nam Zmorge, wott i gah loufe; — was sueche n ig mi Keycard. Es isch hüt nid mi Chartetag. Si chunnt de hinger em Chüehlschrank füre. (Wi si dert häre cho isch, isch e angeri G’schicht.)
Der Fuesswäg füehrt gäge Norde us em Dorf. Allerdings git es da weni Fuess, d Lüt si wie wild mit Outo ungerwäg’s. Fuessgänger si meischtens d Tourischte oder armi Iheimeschi.
Viel Tourischte u viel Iheimeschi bruche mit Vorliebi zwöi oder vier Reder. Es wird g’gäselet, ghornet, gmotoret, brämset u sehr viel i Schlange g’stange. (Me muess aber säge, dass mi Fuessgängerstreife g’halte wird.) E Teil si B’ruefslüt vo u na der Büez. – Wenn dass genau g’schaffet wird, isch äuä individuell. Ei Abe, bim Italiäner, si währed em Ässe sicher meh als es halbs Dotze Betonmischer vor em Reschti düre (mit Getöse u G»steich) das öppe em nüni, – niemer stört’s.
Der Rückwäg mach i über e Strand. De isch Poolzyt, – i bi immer no am Fule. Em eis mache mi uf e Wäg u isse e Cäsar Salat.
I bruche derfür miner letschte Dollares im Portmonnaie, drum mache mi uf d Suechi na me Gäldoutomat. Das isch gar nid so eifach. Die, wo n ig finge, si g’schlosse. Auso, zrügg i ds Hotälzimmer u der ‹Gheimvorrat› bruche.
Nachhär muess i gah bädele, nachhär sünnele, nachhär bädele…
Irgendeinisch düecht mi, i chönnt es Bett bruche u pfuse dert sicher zwo Stung.
Em füfi mache n i no einisch e Bädeliseschen. Em halbi siebni göh mer gah ässe, – diesmal bim Mexikaner. Nach em Entree mit Guacamole ha n i «Ay Caramba Mushrooms Quesadilla». Das si ne Art Tortillas, wo g’füllt si mit de feinschte Sache: Schwümmli, Zibele, Chrütli, chlyni G’müesli … Derzue git es drü Töpfli mit ungerschiedlech scharfe Sösseli. Fein!
Zum Abschluss no ne Espresso. Guet Nacht!