«Hola querida Suiza!»
Informe diario:
desde: 20.11.24
en: Tamarindo Dirià Beach Resort
fotos del dia:
itz chunnt es de…
que vale la pena escribir:
I bi hüt im Dorf ungerwägs. Wi scho geschter gah n ig na de sächse i Pool vor em Balkon. Am siebni isch de ds Zmorge nache u das duuret.
Anschliessend gah n ig i ds Dorf. Tamarindo isch gross. I fasch allne Hüser isch no e Lade, oder es meh oder minger iladends Beizli. Mis Ziel isch e Bude, wo im Internet Walbeobachtigstoure 🐋 abietet.
Mit Ach u Krach finge n i de o öpper, wo sech verantwortlech füehlt. (Die Bude, wo n ig g’funge ha, git es nümm u scho gar nümm a däm Ort, wo mer ds Internet zeigt.) Nu guet. Walbeobachtige git es in Tamarindo vom Dezämber bis im März oder Ouguscht, Septämber. Dä Ma wo mer hilft, meint i sig eifach zwe Monet näb em Plan u o am falsche Ort. Vo Uvita us (südlich) oder em Nationalpark Corcovado würde so Toure düreg’füehrt. (???) [tschüss 🐳]
Es wiehnachtet bal… aber öb der Schneemaa hie, wo’s nie schneit, richtig isch? Na ja.
Werum die Tour, wo n ig im Internet g’funge ha, dert g’landet isch..? – Är chönnt mer e Fishingtour abiete oder eini dür d Mangrove, oder gah sägle. Dankend verabschiede n ig mi. Uf em Rückwäg g’seh n i wenigschtens e Teil vo dere Ortschaft.
Dernah bädele, sünnele, bädele, sünnele…🌞🩳🌞🩳🌞
Der Ananassaft am Meer unger macht fasch süchtig. Bis am Mittag trinke n ig no zwe u luege em Tribe am Meer zue.
Richtig Mittagässe mah n i nid. Drum gah n i gah loufe, em Meer nah gäg Süde zue. Nach öppe zwe e halb Kilometer chum i a ds Ändi vo dere Halbinsle vor Tamarindo. Dert isch e Muur. Derhinger e private Badestrand. I bi ds Langosta acho, es Quartier mit vielne Villene.
Ja, u itz faht es a rägne. Zersch ganz fiin, de geng wie stercher, bärndütsch: es schiffet. Innerhalb churzer Zyt isch alles, wo n i a ha nass.
Guet, ergere, dass i nass bi, het ke Sinn. I chönnt mi höchschtens ergere, dass i ke Rägeschutz mit ha. Also stoisch em Strand na zrügg u i mi Ungerkunft. Chleider wächsle u alles zum tröchne uf em Balkon ufhänke. (Väntilator alah, dass es tröchnet.) Em zwöi hocke n i bi me Salätli, anschliessend eme Expresso, anschliessend zwo ne Chugle ‹Blackberry› Sorbet 🍨 u luege angerne zue, wie si sech im Räge verhalte.
Später, im Zimmer, mache mer e Kafi u brösele de das Tsgesb’richtli. Gäng wieder chöme Schüttine, es trümelet uf em Dach.
Chleider tröchne, isch dusse fasch unmügli. D Luft isch z füecht. I nime se iche u probiere’s da. Für zu me Ergäbnis z cho, brucht es de no d Klimaalag.
Am siebni göh mer gah Znacht ässe.
Tschüss