«Hola querida Suiza!»
Informe diario:
desde: 27.11.24
en: Tamarindo Dirià Beach Resort
fotos del dia:
que vale la pena escribir:
Morge ds Monteverde: Es isch sehr füecht, für nid z säge nass. Mir si hie i re sehr schöne Hotälalag. Das Zimmer isch riesig, d Bedienig hervorragend. Mer ässe sehr guet. D Umgäbig g»seht wunderbar us, grüen u es het sehr viel Natur. Ds Wätter isch hüt dürzoge, – geschter guet.
Nu, was i wott chlöne, will es so viel rägnet, näblet, oder eifach füecht isch, si o d Böim, hinger u über em Hotäl sehr nass u tropfe.
Das allei miech no nüt, we ds Hotäl nid es Blächdach hät. Mis Zimmer isch grad unger em Dach un i ha das Trummle die ganzi Nacht g’hört. D Füechtigkeit kondensiert u der Luft schüttlet d Topfe ab.I ha dadertür nid ganz so guet g’schlafe.
Am siebni Zmorge, am halbi nüni Abfahrt. Der Roberto, der Fahrer vo de letschte vierzäh Tag, fahrt mi em Otto, em Reiseleiter u zwöine Reiseteilnähmende gäge San José. Der Räschte vo der Gruppe stigt i ne angere Bus. Rasant geit es der verrägnet Monte Verde ache u i Richtig Meer. Schad, dä Bärg hätt mer g’falle. Viel Natur u viel Lüt wo Sorg hei u derzue luege. I ha lang nid alles g’seh, aber was mer begägnet isch, het mer Idruck g’macht.
Es isch chley ruppig, die Fahrt vom Bärg ache. Aber mer überläbe’s. I der Raschtstätt ‹Mi Finca› halte mer wieder für n es Kafi. Vo dert frese mer Richtig Weschte, em Meer etgäge.
Die Umgäbig hie isch prägt vo grosse Awäse, Fincas. Aber me g’seht o viel chlyni, ärmlechi B’husige. Es geit in Costa Rica vielne Lüt guet, aber es git o Armi. Em Otto siner Beschribige si mängisch chley z optimistisch g’sy.
Em halbi zwöi chöme mer in Tamarindo a u checke dert i. Ds Usstige us em Bus schocket eim chley. I ha in Monte Verde Chleider a g’leit, wo passt hei. Hie in Tamarindo isch d Tämperatur so um die 30°C u sehr füecht. I muess dringend Chleyder wächsle.
Mis Zimmer het wieder e normali Grössi. Dinn isch uf 24°C ache g’chüehlt u we me use geit, trifft eim fasch der Schlag.
Mer göh i ne chlyne Zmittag a ds Meer ache. Dert isch rächt a g’nähm, bis de chunnt cho rägele.
Zrügg, muess i afe einisch der Pool usprobiere. Dä isch ja g’rad unger mim Balkon. Na knapp ere Viertelstung zieht’s mi us em Wasser. Chuum bi n i wieder im Zimmer, rägnet’s e tolli Schütti.
Büro, ufruume, Wösch plane… fulänze.
Später git es de no e chlyne Happe vor em i ds Bett gah.