«Hola querida Suiza!»

Informe diario:

  desde: 18.11.24

  en: Laguna Lodge, Tortuguero

que vale la pena escribir:

Fertig mit Villa Florencia Hotäl. Es isch schön g’sy zum Übernachte, es stammt zwar us de siebezger-achzger Jahr u viel isch scho ziemli veraltet. Me wartet unäändlech uf warms Wasser, d Dusche si g.’wöhnigsbedürfttig, .- aber es isch suber u ire tolle Umgäbig.

Abg’macht isch, dass mer am sächsi, ohni Zmorge abfahre.
Nu, es git de glych Frücht u fahre tüe mer ersch mit ere Viertelstung Verspätig. Ds Ziel isch Tortuguero. Das liegt ziemli im Nordoschte, a der Atlantikküschte, uf ere Halbinsle.

Dä Ort isch berüehmt für Tortugas, Meeeresschildchröt, wo hie ihrer Eier chöme cho lege.

Zersch si mer aber es Zytli mit em Bus ungerwägs. Nid ganz mit läärem Mage faahre mer bis Viertel nach achti. In Guápiles chehre mer i re typische Tourischtebeiz i, un es git es solid’s Büffee. Für mim Mage Guet’s z tue, isse ig nume g’chocheti Sache. 😉

Na me chlyne Spaziergang im Urwald hinger der Beiz (mit pflegte Chiswägli) g’geeit es mit em Bus wyter. Irgendeinisch bewegt sech es Fuultierä a de Telefonleitige em Strasserand nah. Zwöifingerfuultier! Das git de grad chlei e Stou uf der Strass.

Je länger je meh chöme mer dür Bananeabougebiet.

Für Banane chönne a z boue, brucht es füfzäh verschiedeni Sprützmittel. Costa Rica het beschlosse, bis 2030 kener Banane me z produziere. So viel Chemie passt nid zum Image vo däm Land.

Mer fahre de bis La Pavona. Das si paar Hüser am Flusslouf, e Lade, e Beiz u viel Lüt wo wette Gäld verdiene.

Das isch e Turischtesumpf. Es het o massehaft vo ne, u alli hei ds gyche Ziel: si wei i Schildchrot-Nationaalpark. Mer (u si alli o) stiige uf Boot um, wo üs zum Hotäl bringe.

Vo La Pavona a si mer also uf me Boot. Läng, nid sehr höch ( dass mer bim Fahre no chley öppis vo dere bruune Brüehi mitüberchöme.

D Niederschläg i de letschte Tage si der Wasserqualität nid sehr zueträglech g’sy.

Der Wasserstang isch o entsprächend u ds Wasser geit no mänge Meter i Wald iche. Irgendeinisch g’höre u g’seh me Affe. Brüllaffe u Chlammeraffe si i de Böim am Ufer.

Es isch schwierig dervo es guets Föteli z mache. I ha kes bruuchbars Zoom derby u hocke de ersch no uf der falsche Bootsite. (meischtens). Aber ds Internet hilft us.
Zwüschedüre g’seht me o wieder Fuultier, aber o die si mindeschtens zwänzg Meter über üs.

Churz vor em Mittag si mer i üser Ungerkunft: Zimmer bezieh, gah Zmittag ässe u de chley Zimmerstung.

Mer si hie zmitts im Nationalpark Tortuguerra.
Halbi drü, mer stige wieder i ds Boot.u fahre i ds Dorf Tortuguerra.
Dert göh mer i ds Museeum wo d Arbeit, wo me hie leischtet, i Bilder Filme u Objekt erklärt wird. Costa Rica cha i vielne Beriiche es Vorbild sii. Aschliessend göh mer no öppis gah trinke.

Im Louf vom Nami fahre mer wieder zum Hotäl zrügg.

Düschele, d Bei strecke, Büro mache, … d Zyt bis am sibni isch schnäll ume u mer göh gah znachte.

Uf die halbi zähni bi n i fertig mit ‹Büro›. Das Nationalpark-Hotäl het i de Ungerkünft keh Internet u mi Handyabieter laht mi o im Stich. I muess ds B’richtli bim Hotälbüro verusse mache…

Nu de, guet Nacht!