«Hola querida Suiza!»

Informe diario:

  desde: 17.11.24

  en: La Susanita, Villa Florenzia

que vale la pena escribir:

Es faht früech a mit kozärte vor em Balkon. Es isch aber melodiöser als ds Schuelfescht geschter Abe. Rund um d Ungerkunft het es Unmängine vo Vögel. grossi chlyni, schwarzi, bunti, luti u o liislegi, – alli läbe i dene grosse Böim hie. Mer übernachte i me chlyne Wald.

Na de sibne gah n i zum Zmorge. Ds Büffet isch eifacher als geschter, aber es längt total. Me cha hie o warm ässe u d Frücht si früsch u sehr guet.

Bim Zrügggah zum Zimmer ha n i mi erschti «Superbegägnig» vo hüt. I g’seh vor der Zimmertüre e Zikade, wo d Natur mit der Körperform ziemli g’spielt het: e Fulgora laternaria, e Latärneträger, mit eme Chopf wie es Ärdnüssli. Hät i mer müesse usdänke, wie e Zikade chönnt usg’seh, i wär nie uf die G’stalt cho.

Em halbi nüni fahrt der Bus ab. Zum Glück chöi mer mal ds Gepäck im Zimmer lah. Üses Ziel isch ds Nationalmonumänt vo Guyabo. Dä Ort zeigt erschti (früechi) Besidlige vo Costa Rico. Vo 1000 vor Chr. bis 1400 nach Chr. hei hie Mönsche g’läbt.

Werum dä Ort genau i der Mitti zwüsche Pazifik u Atlantik liegt u o genau i der Mitti zwüsch em nördlechschte u südlechste Punkt vo Costa Rica ligt, isch es Rätsu. Allerdings git das o vieeel Platz für Spekulatione.

Da chöme plötzli Usserirdeschi i ds Spiel, Verbindige zu de Atzteke u em alte Ägypte inkl Stonehenge und und und
Irgendwie bin i mer bi der Füehrig wie bim von Däniken vor cho. 😜

Guet, es si d Überräschte vo me Dorf da. Meh als 1000 Jahr alt u erstunlech guet b’boue. Es het viereggegi u rundi Hüser g’gäh. Es het e pflaschtereti Strass, wo zersch bi de viereggige Hüser verby geit (Wach?) de bi me Platz verby (Spil, Märit, …) zu runde (Wach)Hüser u schliessli zum Dorf-Chef-Hus chunnt. Dert isch me scho ziemli töif im Dorf.

Bi de runde Hüser weiss me anschiinend, dass si chegelförmig b’boue worde sige. Im Bode vom Hus vom Dorfchef heig es e Igang, wo i n es Tunnelsyschtem göng. Die Tunnle füehre überall i ds Dorf (Kontrolle?).

Übrigens isch Dorf äuä der falsch Usdruck. Es heige bis zähtuusig (?) Mönsche da g’läbt. Usg’grabe isch aber nume e ganz chlyne Teil vo Guyabo.
Dür ds Dorf füehre o Wassergräbe. Hinger em Dorf isch e Alag, wo wie e Wasserkläralag funktioniert.  – Alles viel Platz für Spekulatione.

Aber, was weiss me i tuusige vo Jahr no vo üs??

Uf em Wäg zu re Kaffeefarm ässe mer in Turialba i me Beizli. I ha ne Pizza u bi erschlage vo der Grössi.
Vo dert geit es i n es chlyns Dörfli «Aquiares«. Hie wird fasch nume Kaffee a b’boue. (We n i a mi Kafiboum daheim dänke, mit de knapp zäh Chirsch drann, chunnt mer fasch ds Ougewasser.)

Mit de Sorte Robusta u Arabica wärde hie rund zwänzg verschiedeni Chrützige härezüchtet.
Für Costa Rica isch der Kafiabou ung’hüür wichtig, aber si verzichte druf, grossi Mängene z produziere. Me leit totale Wärt uf Qualität.
Entsprächend isch o hie d Produktion: Spezialitäte u tüür.

Mer mache e Füehrig, g’seh d Alieferig vo de riife Beeri, en erschti Sortierig i gueti u schlächti Beeri, d Trennig vom Fruchtteil u de Bohne, d Süberig u Tröchnig u em Schluss no d Sortierig i verschiedeni Qualitätsstuefe.

Am Schluss b’sueche mer d Lufttröchnigsstation (alles Handarbeit) u o dä Ort, wo die ganze Beeri i Fesser fermentiere.(nid für jedi Nase) – aber o dä Kafi wird (tüür g’chouft).
Alles isch interressant u ungerhaltsam.

No Images.
Please upload images in images manager section. Click on Manage Images button on the right side of the gallery settings.
Please make sure that you didn't enabled option: Images of the Current Gallery. Option should have Show value to show images.

Wieder zrügg im Hotäl mah n i nümm ässe. I trinke no früsch presste Fruchtsaft u guet isch.

Em halbi nüni gah n i i ds Zimmer, mache Büro, plane u gah ga pfuuse. Morn geit es früech use.

Ápropos früech use. Die da begägnet me uf ganz Costa Rica. Vom Morge bis am Abe wird g’chrampfet. Blattschnyderameise reiche Blattbitzli, wo si dermit e Pilz i ihrem Näscht fuettere u vo däm Pilz ässe si de… Bure, richtig Bure!