«Hola querida Suiza!»
Informe diario:
desde: 16.11.24
en: La Susanita, Villa Florenzia
una dos tres fotos del dia:
que vale la pena escribir:
Der hütig Tag fahrt mit me guete Zmorge a. Ab de sächse wär ds Büffee ufb’boue, mi zieht es ersch em halbi siebni übere. Will mis Zimmer im Ärdg’schoss isch u g’rad näb em Reschturant isch, ha n i e churze Wäg.
G’schlafe ha n i mittelmässig, aber itze.
 |
 |
 |
 |
 |
 |
 |
 |
 |
 |
 |
 |
 |
 |
Em halbi nüni fahre mer mit em Bus ab. Zersch si mer no i der Houptstadt San José. Alti, koloniali Geböid git es no, u si wärde o pflegt. Mer besichtige e Kathedrahle, wo scho no so Idruck macht. Später si mer de im Theatro National, wo no ds Cafeteriamobiliar us der Kolonialzyt isch.
Vo San José geit der Wäg i Richtug Cartago. Das sig die erschti Houptstadt g’sy.
I der Provinz Cartago isch o der Vulkan Iratzù, – dä isch ds Ziel.
Der Iratzù gilt als semi aktiv. Das Loch isch zwar imposant, aber de doch enttüschend. Ke Kratersee, kes Röichli, nüt! (Heinze würd gah grabe😉.) 1994 sig är ds letscht Mal aktiv g’sy. Nu, i ha gloub scho imposanteri g’seh.
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
D Wättergötter si uf üsere Site. – Mer fahre häre u der Näbel tuet uf.
Ds Wätter isch nid wahnsinnig, aber es geit. Me cha fötele u de doch es chlyses Spaziergängli mache. Chüehler isch es u d Luft isch o tröchener.
– Mer fahre wäg, der Näbel chunnt zrügg u es.faht a rägne.
Es gäb Lüt, wo scho x mal uf dä Bärg sige u no nie i Krater g’seh heige.
Es isch e fruchtbari Gäged da. Die Vulkanusbrüch hei de Böde guet t’ta. Trotzdäm mer uf drü e halb tuusig Meter über Meer si, wird Landwirtschaft betribe. I der Schwiz wärde uf dere Höchi höchschtens Guschti g’sömmeret. I gseh ganz viel Härdöpfuächer, aber o Zibele und und und. Viel Land isch o unger Plastiktunnle u was all die Manne mit Rüggesprützli versprütze wett i nid wüsse. Vo nüt chunnt nüt u d schwizer Agrochemie muess o verdiene. 🤔
Uf der Wyterfahrt dominiere zwöi Theme: vor mir redt me über erläbti Chrankheite u hinger mir über früecheri Reise. – Es si halt alles alti Lüt im Bus.
Dusse wärde teil Hüser scho mit Wiehnachtsbelüchtig vollg’hänkt.
I der ‹Cocina de mi Pueblo‹ chehre mer zum Zmittag i. Das isch e Beiz mit typischem Ässe. Es isch eifach, aber guet. I berchume mi vegetarisch Täller.
Tja, o hie faht der Räge a bi der Wyterfahrt.
Die nächschte zwe Nächt si mer i der Villa Florencia. (Da isch g’rad es Bum Bum Fescht. Hochzyt/Geburtstag/Toufi..?) D Musig louft ömu lut.
[Später vernime n i de, dass es es Schuelschlussfescht isch. In Costa Rica isch der erscht Schuelabschluss nach der sächste Klass. Das muess g’feschtet sii!]
Es git no es chlyn’s Znacht, de isch scho der zweit Tag düre.