«Hola querida Suiza!»
Informe diario:
desde: 15.11.24
en: San José
una dos tres fotos del dia:
que vale la pena escribir:
I stuune ja scho chley über mi, sider em Mittwoche fertig g’packt, sider geschtert em sächsi i checked, sider em halbi füfi uf, düschelet, zmörgelet, Ghüder duss, – i bi fasch chley e Sibesiech.
Ds Nachbarschaftstaxi funktioniert tadellos, d BLS het de Problem mit ere Weiche (15Min), aber es längt no uf e Zug gäg Züri.
Iche i Flughafe, zum Gepäck self drop in. Fruscht! Dä Scanner kennt mi Bordcharte im Handy nid, – am Schalter muess i de zersch der Pass vüregrüble. Nachhär bi n i doch de o mi Goffere los.
I der Sicherheitskontrolle isch weni los. Derfür näme si’s gaaaanz genau. Vor mir e Familie mit Bébé. Was da alles a Sälbeli, Säftli, Öl speziell muess prüeft si. Wo n i de äntlige dra chume, näme si mis Ruckseckli total usenang. Das ha n i so no nie g’seh Derby ha mer hüt Müehi g’gäh u alli Batterie u süschtige G’rätli i ne seperati Trucke tah.. D Zahnpaschta, der Sunneschutz, … alles wird i n es Plastikseckli g’chnuschtet. – Es sig alles ir Ornig (hätt ne ja chönne säge). Ipacke, (werum ha mer so Müehi g’gäh mit der Packornig im Rucksack?) pressiere, – zum Gate E 37 – warte,warte,warte. Eigetli sött me scho chönne i stige, aber – es geit no zwänzg Minute u o der Flüger zaaget de no einisch.
Mit ere knappe Halbstung Verspätig starte mer.
Aber itz, i bi dinn i dere Flugere. Costa Rica, i chume.
Eigetli isch mi Sitzplatz nid schlächt. I der Mitti, näb mir zwe läär Plätz, – aber als rächte Schwizer muess me nörgele. Linggs hinger mir isch mis «private» WC; werum hei all i mim Gang ds G’füehl, si müesse o geng da druff.
Längeri Pfüsi, geng wieder ässe u Zäng putze, e Filmserie… So nach siebe Stung flüge hätt i eigentli g’nue. Es geit aber gäng no meh als vier Stung.
So, chley meh rächts u mer chönnte in Kuba lande. 2000 km wyter isch San José.
Es isch scho no so interressant, am Viertel vor zähni abzflüge u am zäh ab zwöi isch me ds Costa Rica: vier e halb Stung 🤣 wär da nid no d Zytdifferänz vo siebe Stung: 9470km.
Denn wo i der Schwiz öppe nüni isch, lande mer. Für d Passkontrolle git es die erschti Schlange, aber o die erschte Bekanntschafte zu Mitreiseende. Bim Usgang wartet der Otto, der Reiseleiter. Mit em Bus fahre mer de i zwöit Stou. Es isch Friti, es isch Abe, es wei all i Fürabe – oder scho i Usgang.
O in Costa Rica isch ds Outo ds wichtigschte Fortbewegigsmittel; – mit entsprächende Folge.
 |
 |
 |
 |
Chatz u Muusspieli git es o in Costa Rica. Allerdings isch d Muus es chlyses Hüngli. Was louft ächt da, – würd mi sehr interressiere.
Mer chöme a, – ds Hotäl isch guet: was wott me meh.
Zu me Salat u miserabel falscher Klaviermusig hört dä Tag uf.