«Hola querida Suiza!»
Informe diario:
desde: 21.11.24
en: Arenal Springs Resort, La Palma
que vale la pena escribir:
We n ig zum Bett us luege, de g’seh n ig uf e Arenal.
Es isch scho wieder seeeehr warm, obschon’s Morge am sächsi isch? Na der übleche Morgeroutine blibt no Zyt, für chley zhöckle; -vor em Hus, uf em Bänkli. Uf die halbi achte isch Zyt für Zmorge.
Hät mer öpper vor me halbe Jahr g’seit, i söll Riis mit Bohne ässe, derzue g’chocheti Manjokwurzle mit Rüehrei u das zum Zmorge, i hät äuä der Chopf ziemli g’schüttlet. – Aber, es isch guet!!
Em halbi nüni fahrt der Bus i Richtig Arenal. Das isch dä Vulkan, wo g’rad näb La Palma liegt ( der nächscht grösser Ort isch de La Fortuna, u was näb was liegt isch mängisch schwär z säge).
Um e Vulkan isch Naturschutzgebiet. Mer fahre uf ne Parkplatz u dert faht e knapp vierstündegi Wanderig dür e Wald a. Das tönt aber wilder, als es isch. Ds Strässli isch guet usb’boue.
Der Arenal isch e aktive Vulkan. Der letscht Usbruch isch 2003 g’sy. (uf em Föteli g’seht me links, näb de Wulche es Röichli). Är chönnt also jederzyt wieder usbräche. Drum dörfe d Tourischte nid ueche u der Krater aluege (o we eim das g’luschtet). Drohne si o verbote.
Mer loufe so wyt ueche, wie mer dörfe. Dert g’seht me uf ne Stousee (Laguna de Arenal), wo idrückllech gross isch. ( Drunger sige drü Dörfer, wo bi me Usbruch im vorige Jahrhundert sige drunger cho.)
Der Abstieg mache mer individuell dür Waldwäge, was no so idrücklech isch. I g’seh e ganzi Mängi Tier ungerwägs i däm Blettermeer. Ganz zungerscht wirde n i vo zwe Naseebäre überrascht, wo mitenang es Kämpfli us z fächte hei. Zäme springe si uf mi zue, fuuche, brüele u biisse; – es schiint ärnschter z sii. So zwe Meter vor mir zueche halte si, de het der eint g’nue u zieht sech zrügg.
Mir fahre i ds Hotäl. Dert git es e Ungerbruch zum chley sii u düschele.
Am vieri fahre mer uf ds Land zu me Buur, eme Campesino. Dä zeigt üs afe mäl, was är hie so a bout. Da derzue g’hört o Zuckerrohr, mer presse üse eiget Saft: guet z trinke. Nachhär füehrt er is dür e ‚Garte‘, i drücklech, wäs da alles wachst .
Mit si re Muetter choche mer de Znacht. Guet, üse Bytrag isch symbolisch u beschränkt sech uf ds Schnibble. D Donna macht ds Meischte u passt guet uf.
Ds Nachtässe, wo da drus entsteit, isch cheibe guet.
Dernah hei mer e Demonstration vo costaricanische Tänz. Cheibe viel Energie, wo die hei. I bi ehnder e Bitz flach.
Em halbi nüni lige n i uf em Bett.u mache Büro. Nüt vo Schnee, geng no fasch drissg Grad…
