23. Juni 2023 07:43

bul. «Hristo Botev» 3, 9000 Varna Center, Varna, Bulgarien | 21°C

 

Warna, Varna, Варна, Stahlin, oder Odessos – je nach Sprach u Zyt. D Stadt am tote Meer isch sowohl i der Zyt, als o vo der Sprach här bedütend.

Mer si geschter bis Varna am schearze Meer g’redlet. Es isch e ziemli längi Fahrt g’sy, drum muess der Chauffeur hüt ruehie.

D Zyt wird üs aber sicher nid läng. Üse erscht B’suech gilt de Römer. D Stadt het denn Odessos g’heisse u isch e bedütendi Hafe- u Handelsstadt g’sy. Aber, wie das so geit, nach jedem Höheflug chunnt der Niedergang. D Römer hei d Ressource verbruucht g’ha, drum u us politische Gründ, het die römeschi Zyt nid so lang d’duret.

Die römische Villene si verg’heit u überboue worde. Das isch o mit de Therme vo Odessos so g’sy. Die Therme hei zu de grösschte g’hört u n es riesigs Gebiet i gno. Nume no der «römisch» Turm het später us em Bode g’luegt. Ersch im 20. Jahrhundert het me de afa grabe u dä ganz Komplex wieder us em Bode g’holt.
Dass d Römer, für die Therme chönne z heize, irgendeinisch der ganz Wald abg’holzet hei g’ha u de ds Brönnmaterial hei müesse choufe, het zum Niedergang vo Odessos bytreit.
Die Ruine wo mer göh ga b’sueche, si i ihrne Dimänsione scho no so idrücklech. Die grosse Halle für d Chleider abzlege, ds chalte, wermere u heisse Bad, die viele Näberüüm, der Heizigskomplex, – all das isch überwältigend, für dass es über zwöituusig Jahr alt isch.

B’sungersch, we me sech de äbe vorstellt, wie die Rüüm ( o im Winter) hei müesse g’heizt wärde, zeige der Ufwand, wo da betriebe worde isch. .- Klar, das hei Ungerhüng, Sklave müesse mache, – aber we de ds Holz fählt, will äbe die Stadt i re Steppe ähnleche Umgäbig steit, de wird es schwierig.

Nach däm B’suech i de Ruine, loufe mer zum Antikemuseeum.  Will äbe Varna so ne wahnsinnig langi Zyt steit, git es i däm Museum o so viel uszstelle. Bi üsem B’suech göh mer aber vor allem wäg em elteschte Guldschatz, wo me vo Mönsche kennt. Mer föh aber bi de erschte, g’fungne Hingerlasseschafte a, wo i däm Museum usg’stellt wärde. Die Steimässer si je nach däm, zwüsche zähtuuusig bis hunderttuusig Jahr alt. So extrem viel kunschtvoll’s g’seh n i no nid da drin. Aber scho i de G’fäss, wo zwüsche viertuusig u füftuusig Jahr alt si, stune n i nume ab der handwärchleche Usfüehrig. Die Oberflächine u Sgraffito-G’staltige si meischterhaft.
(I vielne Gebiet vo Bulgarie wärde no hüt die glyche Technike a g’wändet. Mer hei in Weliko Tarnowo e Töpfer b’suecht, wo no die Technik a wändet u d Hüser i däm Ort hei o gäng ei Site mit Sgraffito g’staltet g’ha.)
Verblüffend isch aber o der Guldschatz, wo me us g’grabe het. Wahnsinn die Pracht. Wär’s interessiert, i mache hie e Linkzu re Site vom Museum, wo öppe zeigt, was o mir a g’luegt hei. O d Föteli gäh e Idruck vo mire Begeischterig. Bim Useloufe hei mer de drüber g’witzlet, was i de Gräber vo der hütige Zyt ächt z finde wird si.

 

 

Zmittag ässe mer mitenand am Meer unger. Dert reiht sech eis Resturant a ds angere. Nach längem finde mer sogar eis, wo alli i der Gruppe iche chöme. (Es isch nid ganz eifach uf der Wält …) Nu de, i isse rächt guet. So gäg die halbe drüü trenne mi vo de andere. I mache mi uf d Suechi nach ere nöie Zangbürschte. i me lilly-Märit finge n i, was i sueche u ds fründleche Meitschi im Lade hilft mer. Dernah muess i no Salzwasserspray ha für d Nase. O das Problemli isch bald g’löst. De muess i aber no die Kathedrale gah a luege, wo n i i der Zwüschezyt e paar Mal drann verby bi g’loffe. A der Strass usse hout mi e alte Mänu a, öb i es Taksi bruuchi. Es stellt sech de use, dass er ganz guet dütsch cha u e Tochter in Düsseldorf het. Mer b’richte es Zytli u är verzellt mer us sim Räntnerläbe u ig vo mim.
Zrügg im Hotäl fah n i mal mit Büro a u probiere miner hütige Idrück i Wort z fasse.

So um die sächse berchume n i G’luscht uf öppi z ässe. I loufe vom Hotäl us dür mehreri Sitegässli u chume de zum Mario. E Tomatesalat, Zibele, Chnobli par Peperoni u derzue es Fladebrot u es Mineral. Super! I stinke wie ne Chnoblouchiltis us em Mu, wu n i mi nach me Espresso de wieder zum Hotäl ufmache. Em halbi achti bi n i wieder im Hotäl. Dä ganz Spass het mi 13.26 Lew g’choschtet, das si öppe sächs Franke dreiesächzg u: – i ha nume Bulgarinne u Bulgare begägnet. 😊