20. Juni 2023 08:25
3th floor, bul. «Knyaginya Maria Luiza» 9-11, 1000 Old City Center, Sofia, Bulgarien | 18°C
Der Morge si mer in Sofia. Dert lehre mer viel über e Wohnigsmärit i dere Millionestadt. I kommunistischer Zyt si grossi Stadtteile mit Platte b’boue worde. Vorg’fertigte Betonteile, wo itze fasch alli boufällig si. Me müesst renoviere. I dere Bouzyt si die Wohnige zu günschtige Kondidione a d Bewohner verchouft worde, so dass hüt e grosse Teil vo dene Hüser vo B’sitzer bewohnt wärde. Die Wohnige si vererbt worde a Ching u Grossching, so dass hüt i grosse Blöck hunderti vo Wohnigsb’sitzer wohne. Muess renoviert wärde, müesse die einzelne B’sitzer alli i verstande si, – was natürli , us verschiedene Gründ, sehr schwierig isch.
Us däm Grund löh einzeli vo de Bewohner ihri Wohnig lah dichte u renoviere, – o vo usse. Da dertür g’seh de die Platteboute wie ne Flicketeppich us.
Mer fahre i d Innestadt, i ds ‹Religionsdrüegg›. Das het am Rand e Moschee, e ortodoxy Chilche u Synagoge. I däm Gebiet si nach em zweite Wältchrieg grossi Usgrabige us der römische Zyt g’macht worde. Idrücklech, mer loufe dertür.
Bi der ‹Badi›, eme grosse, historische Hallebad mit Thermalquelle zegt sech ds glyche Problem wie vielne Orte uf der Wält. D Renovation vo däm Hus isch für d Öffentlechkeit nid tragbar g’sy: – drum blibt das Hus zue (bis e Private d Renovation zahlt).
D Thermalquelle isch scho vo de Thraker kennt worde u Grund g’sy, dass si hie e Stadt b’boue hei: Serdonopolis.
Mer chöme bi re grosse, no nid so alte Statue verby, wo der Stadt g’schänkt worde isch. D Usfüehrig (es hätt die heilegi Sophia sölle wärde) het aber de Chircheobere gar nid g’falle. Mit Müehi u Not het chönne e Abriss verhinderet wärde. Itz seit me re eifach nid ‹Sophia› u isch trotzdäm irgendwie zu me Symbol vo der Stadt worde.
Bim Wyterloufe chöme mer bi der Nationalbank verby. Der vernähme mer, dass Bulgarie e grosse Teil vo der Währigsresärve i de Tresore mit Roseöl bunkeret wo e sehr tüüri u im Pris beständegi Sach isch.
Es het o e ganzi Anzahl vo Botschafte i däm Gebiet. China, Russland, Italie u Frankrich si verträte.
Rund um Bulgarie het es e Reihe vo Länder, wo ungerschiedlechi Behandlig erfordere. Rumänie isch eine dervo. Mit dene het Bulgarie i der G’schicht zwöimal Gebietsproblem g’ha. Hüt chöm me rächt guet us, b’sungersch will me ja zäme i der EU isch. Zu der Türkei heig me es zwiespältigers Verhältnis (schliessli si das d Osmane g’sy, wo Bulgarie b’setzt hei) si hei o Teile vom Land für sich be a sprucht. D Türkei isch zwar e wichtige Exportpartner u viel vo der Läbeswys isch i dene Länder glych (Chuchi). Ds Glyche gilt o für d Grieche. Es chunnt zu vielne Sticheleie, aber eigetli chunnt me us. Mit Mazedonie eint d Sprach, wo i Teile ähnlech bis glych isch. Ds Verhältnis zu de Serbe sig schwierig u gäng wieder vo grosse Problem prägt.
Ganz eiget isch o ds Verhältnis zu Russland. Bis 1944 isch Bulgarie e Monarchie g’sy. Me het e bulgarische Zar g’ha. Dä isch öfters dür Russland bestimmt worde, oder si hei ds Iverständnis g’gäh (oder o nid). Russland isch lang e ‹grosse Brueder g’sy. Hüt isch d Ischetzig differenzierter. O d Befreiig nach em zweite Wältchrieg (Bulgarie het de Dütsche g’hulfe) wird kritischer a g’luegt.
Der letscht ‹Zar› Simeon II isch in Spanie ufg’wachse u redt schlächt bulgarisch. Er het es politischs Amt wölle aber het o als Minischterpräsident nüt bewirkt für ds Land.
Bulgarie isch i wyte Teile landwirtschaftlech b’brägt. Im Norde wärde viel Sunneblueme a b’boue. Olive räntiere nid, gäg die grosse Oliveölproduzänte u Räps cha fasch nume für Ökodisel a b’boue wärde. Dernäbe het es verschiedeni Getreide, Mais u äbe Rose für Öl u ne ufsträbendi Winzerlandwirtschaft.
Bulgarie isch chlynrüümig u het Problem, vo de EU-Gälder für d Landwirtschaft chönne z provitiere.
Und, Bulgarie isch eine vo de grösschte Guld’produzänte› in Europa. Trotzdäm, Bulgarie isch es rächt arms Land; – b’sungersch uf em Land.
Korruption isch eis vo de grosse Problem in Bulgarie. Me het mit de alte ‹Garde› nie ufg’rumt!
