Es härzlecht’s – Mirmengjesi- us Albanie
Tages – B’richt :
vom: 13.10.24
in: Permet
was:
… isch passiert …
Em Viertel nach sibni zum Zmorge, isch hüt e chlyni Useforderig für mi.
Ja nu, es muess sii. Hüt geit d Gruppe verschiedene Interrässe nah. Es het ere, wo wei gah Rössli rite, es het ere wo wei gah River rafting mache u ne Teil geit em Vormittag gah wandere. I bii bi der letschte Gruppe u ha ds G’füehl, das tät mir am beschte.
Viertel ab achti schuehne mir i ds Dorf ache; -ängs Gässli, höchi Muure rächts u linggs. Es geit um e Mittagsproviant. Der Supermärit het zue (es isch ja schliessli Sunntig). D Beckerei u der Früchtehändler hei offe, Wasser ‹berchum i i der Beiz; – also was wott i no meh?
Mit eme ortsasässige Busschofför fahre mer zersch vo Përmet bis Strembec. Vo hie, rund 500m ü.M. loufe mer ueche uf knapp 950m. Es isch e rütschegi Strecki, wo mer da zrügglege, s het Schotter, aber we me chley luegt, geit es guet. Asträngend isch es streckewys o, aber me cha’s ja rüehig näh.
Uf halber Strecki chöme mer bi me Wasserfall verby: idrücklech!
Vo da a geit es no einisch dopplet so stotzig obsi. Obe isch e chlyni Hochäbeni, wo zu g’wüssne Zyte Schaf oder Geisse weide.
Mer ässe – u nach ere Ruhepouse chunnt der Abstieg uf em glyche Wäg.
Das isch nid es Mal längwilig, will die Gräbe em Wäg nah sehr interressant sii. Steine u Böim bilde e tolli Abwächslig – u irgendwie e Symbiose.
Der Schofför wartet scho u charrlet üs wieder ache; – es isch ersch früeche Nami. Unger chunnt de der Thuri, üse Schofför u verfrachtet üs bi Petran ds Tal ueche. Dert het es heissi Quelle, (hot springs) wo me scho vor em Usstige us em Outo schmöckt. Fuli Eier si e Dräck dergäge. (Aber me g’wöhnt sech drah, nach ere Viertelstung schmöckt mes nümm.)
Nu, mer bade un es isch guet.
Näb em warme Fluss cämpiert e Bärner, – es git se überall.
Gäg die füfe si mer wieder in Përmet. Zyt für sech z erhole, z düschele u mit Büro a z fah.
Uf die sibne göh mer i d Stadt gah g’meinsam ässe. Es git wieder Mängene u ganz verschiedeni G’richt. Nach der Vorspiis ha n i g’nue.
Aber, uf em Heiwäg zum Hotäl, bim Patissier, finge n i de glych no es Plätzli für n es Cornet z versorge. 😋
