Es härzlecht’s – Mirmengjesi- us Albanie
Tages – B’richt :
vom: 11.10.24
in: Korça
was:
… isch passiert …
Hüt si mer im Trenova Nationalpark ungerwägs.
Am nüni fahrt üs der Thuri, der albanisch Chauffeur bis i ds Dörfli Drenova, vo Korça us si das paar Minute. Zwüschdrinn choufe mer e Art Burek oder Pite mit Chäs u Spinet drinn.
So, u itz faht der Ufstieg a. Zytewys isch das chley e Chrampf u ne Plaggerei. Aber ds Strässli i Park ueche geit mängisch o äbeswägs. Usserdäm cha me ds Tämpo ja apasse u Pöiseli mache. I chume rächt guet obsi.
Es isch e wildi Natur, wo da um üs ume isch. Obschon d Zivilisation hie obe ihri Spure het hingerlah. Irgendeinisch chöme mer zu me Chohlebärgwärch, wo währed der Zyt vom Enver Hoxha isch (zwangs)betriebe worde. Hüt g’seht me no Teile vo de Gebäude. Still roschtet ds Ise u d Muure g’heie i. Denn si d Lüt zwunge worde, für e Enver z chrampfe. Der Fridhof steit no.
Gebäude, wo no stöh, wärde als Chuehstall b’brucht, aber der Hirt het siner Tier g’rad uf der Weid.
Vo hie geit es no einisch guet so wyt bis zum Mittagshalt. Dä mache mer bi re spezielle Felsformation wo «Geisschopf» heisst. Mi düecht zwar, dä g’säch ehnder wie ne Dino us oder wie e Drache. Es Stückli wyter obe zweige mer ab vo der Strass. Itz geit es im Gänsemarsch em Hang nah.
Zytewys isch ds Wägli kener zwe Schueh breit u linggs geit es toll ds Loch ab. I bi froh für jedes Stückli wo breiter isch. Hie isch zwar Nationalpark, aber me trifft gäng wieder Manne, wo mit Esle, Muutier oder Rössli u re Motorsaagi ungerwäg’s si. Erstuunlech, dass die zum Teil uf dene änge Trampuwägli no uf em Tier rite. Si reiche, was si bruuche zum Heize, wie eh und je, öb Park oder nid.
Überhoupt laht sech hie mache, was me wott. Uf der hingere Site begägne mer grosse Flächene, wo schiins sige zum Hanfabou b’brucht worde. Irgendeinisch heig d EU reklamiert. (Albanie isch der gröscht Hanfproduzänt in Europa.) Öb d Pflanze itz eifach chley wyter hinger im Park u versteckter dörfe wachse??
Irgendeinisch geit es de o wieder nidsi. D Wägli wärde Bachbett u me het Müehi, ke Schueh voll use z zieh. Em halbi füfi si mer ds Mborje. Zum fiire vo däm Tippel chehre mer i re Gartebeiz i.
Zrügg in Korça mache mer Pouse u göh de gah Znacht ässe. Es geit i d Villa Cofiel. Ds Ässe isch wieder sehr guet, i bi Fan vo dere Chuchi.
Fiirabe git es hüt spät. Es isch Fritig u unger i der Beiz isch viel Betrieb mit Musig. Guet Nacht!
