Es härzlecht’s – Mirmengjesi- us Albanie
Tages – B’richt :
vom: 10.10.24
in: Korça
was:
… isch passiert …
Luxus pur! D Unterkunft in Korča isch e Fröid.
I bi hüt Morge in Ohrid (NMK) im Zimmer im Bett g’läge u ha dänkt, dass i sälte i me so unpärsönleche Zimmer bi g’sy. Blutti Wänd, e Vorhang, es Pressspan-G’stell, drü Bett: dergäge het ds erschte Zimmer in Havanna vor Ambiance g’sprüeht.
Doch der Reihe nah. Em halbi achti si mer mit Goffere vor der Ungerkunft, mir starte zum Zmorge: e Strass wyter isch ds Reschturant u mer si a g’mäldet.
Anschliessend geit es zum ‹Zmittagkömerle› i Supermärit.
Das funktioniert, obschon i kes nordmazedonisches Gäld ha; – Chärtli sei dank.
Vo Ohrid fahre mer zersch uf der Oschtsite em See nah. Fasch am Ändi vom Ohridsee in ‹Trpeica› geit es der Hoger ueche. Uf halbem Wäg zum Prespasee halte mer.
Hie faht die hütegi Wanderig a. Dür e Wald ueche si mer gly toll i re Bärgwält, wo zu me Nationalpark g’hört. I churzer Zyt si mer über der Boumgränze. Der Ufstieg isch steil u hert.Vo rund 1800m.ü.M. loufe mer 500m i d Höchi u über 6km i der Längi. De isch der «Marapo» bezwunge. Ds Wätter isch währed em Ufstieg guet, dobe geit de der Luft wie wild.
Nach em Gipfel git es Zmittag us em Rucksack. Es isch hilber u bal druf chunnt d Sunne füre.
Der Abstieg geit tifiger. Nach vier Stung si mer wieder bim Bus. D Wyterfahrt geit gäge Prespasee zue.
Ds Panorama isch einzigartig!
Üsi Fahrt geit aber bis Korča, wo üses nächschte Hotäl steit. Hie blibe mer zwe Nächt. O ds Nachtässe isch hervorragend, i cha nume lobe.
Es zieht sech i d Längi. Nach drei Stung ha n i ds Gfüehl, i sött i ds Bett. B’sungersch will i Halsweh ha.
Drum, schlafet guet i der chalte Schwiz, hie isch gäng no 17°C i der Nacht. Morn söll es.am Mittag 25 Grad gäh. Guet Nacht!
