Es härzlecht’s – Mirmengjesi- us Albanie
Tages – B’richt :
vom: 9.10.24
in: Ohrid NMK
was:
… isch passiert …
Der hütig Tag faht relativ früech a. Am halbi sibni geit der Wecker u de geit es Schlag uf Schlag: – düschele, Büro (der geschtrig Tag isch no nid abg’schlosse), packe (es geit ja scho wieder wyter) de gah zmörgele, Zähn putze, fertig packe, no einisch am Bytrag umegrüble (das cheibe Internet) u de muess me scho i Bus istige.
Scho churz nach Tirana chöme mer bi der Burg oder Feschtig Kruja verby. Hie söll der Skanderbeg sini Schwöschter ungerb’bracht ha.
Die hütegi Fahrt geit vo Tirana wäg a Ohridsee übere. D Busfahrt füehrt dür ängi Klus-ähnlechi Täler. D Strass, die alti, stillg’leiti Isebahnlinie u der Fluss ‹Shkumbini› teile sech der Platz. Zitewys stöh o no Strommaschte. Itz wird no e zwöispuregi Outobahn b’boue u das ziemli rigoros (um nid z säge rücksichtslos). D Isebahnlinie söll de o irgendeinisch nöi g’macht wärde…
Es isch e gebirgegi Gägend, wo mer dürquere. Vo knapp drühundert Meter fahre mer uf knapp tuusig ueche u hinger gäge Ohridsee wieder ache uf siebehundert Meter. Vom Kafihalt a, öppe i der Mitti vo der Fahrt, begleitet üs Rägewätter.
Vom Dörfli Lin us mache mer is zu re Rundwanderig uf. Es isch de wieder rächt guet Wätter. Nach knapp zwo Stund si mer zrügg u dörfe bi re iheimische Familie gah Zmittag ässe. Es isch es Ässe mit toller Ussicht, diräkt am See uf ere spezielle Terrasse.
Am Nami fahre mer mit em Bus nach Nord-Mazedonie übere. Schad dass der Fahrer näbscht de Päss o no Gäld muess mitnäh. Über Struga fahre mer um e See nach Ohrid.
Üsi Ungerkunft isch fasch am See vorne. Nach ere churze Pouse zeigt üs der Martin, e Nordmazedonier, Teile vo der Altstadt. Wil i ja vor zwöi Jahr scho mit em Gafur hie bi g’sy u der ober Teil vo der Altstadt a g’luegt ha. Bi n i froh dass es diesmal nume für e unger Teil längt. Nachhär isch dunkel.
Znacht göh mer g’meinsam gah ässe. I ha ne feini G’müessuppe u n es ruschtikals Omelett. Isch guet g’sy. Der Wirt macht sech aber luschtig, dass das in Nordmazedonie höchschtens es Zmorge gieb. Na ja, es si äbe Roubtier, hie in Nordmazedonie.
Itz bi ni wieder i der Unterkunft, es isch bal zwölfi. Tschüss