D Stärne im Wappe vo Slowenie wärde hüfig mit de drei gröschte Stedt vom Land glychg’setzt. Ei Stärn isch Ljubljana, eine Celje u ei Stärn stöngi für Maribor.
Föteli vo hüt:
Hinger em Stadtschloss, «Kojak» Kunstwerk
Roti Chilche Maribor
Marktplatz mit Peschtsüüle
Fassade zum Marktplatz
letschti Teile vo der Stadtmuur
Datum: 02.09.2025
Übernachtig: B&B Maribor
Erläbnis:
Maribor het hüt rund 110’000 Iwohner. D Römer si no nid hie g’sy, denn het es da no nüt g’gäh. Ersch öppe um 1000 sy d Afäng verzeichnet. Dür Maribor (Marburg) u em Fluss «Drau» nah isch scho früech Handel tribe worde (Ungarn – Österreich). 1164 wird hie e Burg erwähnt, um dä Handel z kontrolliere, das isch d Marburg g’sy.
Slowenie isch slawisch u het e slaweschi Bevölkerig. Im 17. Jahrhundert het es e starche Zuezug vo Lüt us germanische Länder g’gäh. (Öschterrich, Dütschland) Da dertür isch d Stadt Maribor e dütsch sprächendi Insle im slowenische Umland worde.
Das isch so b’blibe bis zum erschte Wältchrieg. D Habsburger (dütsch sprächendi Lüt) u d Slowene si mit enang z Schlag cho. Nachhär fah die grosse Wirre a.. (lies ds Wiki)
Hüt g’seht me vo der Burg nümm. Uf em Hügeli hinger der Stadt isch no e Kapälle u unger si Wybärge. Überhoupt isch der Wy-Abou u Handel der wichtigscht Wirtschaftszweig vo der Gäged hie.
Morge am achti höckle mer no bim Zmorge in Celje. Nah de nüne fahrt üse Zug nach Marburg oder äbe Maribor. Alles verlouft wie am Schnüerli. Üses Hotäl, ds B(ed) & B(reakfast) in Maribor isch e ganz moderni (Juged)herbärgi.
Nam Mittag hei mer e Stadtfüehrig vo der ‹Nada›. Si erklärt üs ds Nötige u füehrt üs i der Stadt ume. Unger angerem o der Esel Egge: Lehrer si vor laaaaaanger Zyt im Reschturant zäme gah ässe u hei g’seh, dass sech ihrer Schüeler am Egge gägeüber mit Meitli verabredet u troffe hei. Drum hei si dä Strasseegge «Esels Egge» touft; – u der Name isch b’blibe…
Na zwone Stung trenne mer is vo üsere Begleitig, nachdäm si üs no der ältischt Räbstock zeigt het. Denn si mer a der Drau unger.
Mer göh de zrügg i ds Hotäl chly gah ‹löie›. Zum Znacht göh mer no einisch i d Stadt u ässe wunderbar italiänisch.
- Location: 46° 33′ 38.7072″ N 15° 38′ 53.1707″ E
