Ds Slowenie wärde zweievierzg Dialäkte g’redt, dass me sech versteit im Land git es e Art Hoch-Slowenisch, wo me o schribt. Ähnle h wie i der Schwiz git es e Vielzahl a traditionelle Chleider. Fasch jedes Tal het e eigeti Tracht.
Föteli vo hüt:
Datum: 29.8.2025
Übernachtig: City Hotel, Ljubljana
Erläbnis:
Hüt, am zweite Tag in Slowenie isch üses Ziel ds Logar Tal.
In der Nacht het ds Wätter umg’schlage. Es rägnet am Morge wo n ig ufstah. Em halbi achti gah n ig gah zmörgele. Ds Agebot isch toll. Friederichs chöme o, will der nächscht Träffpunkt am nüni i der Lobby isch. D Mateja holt üs mit em Outo bim Hotäl ab, für mit is i ds Logar-Tal z fahre.
Es isch chley e «Furz» g’sy, dert häre z gah. Mer hei g’läse, das sig es ‹touristisches Muss›. (Hinech bi n i nümm so sicher.)
Nu, mer fahre am nüni ab. I nördlecher Richtig geit es der Gränze gäge Öschterrich zue. Ds Kamnik mache mer es Pöiseli, luege ds Stedtli a u näme es Käfeli. De geit es wyter, i der Zwüschezyt wird es bärgiger u d Outofahrt für mis Mägeli zu re Useforderig. Ig bi froh, si mer nah de zwölfe im Logartal.
Dert parkiere mer ds Outo u mache de e chlyni Wanderig zum Rinka Wasserfall. Dä isch idrücklech u o sehenswärt.
Nach re Stung si mer wieder uf em Rückwäg. Itz hock i vorne im Outo. Es rägnet ir Zwüschezyt wie us Chüble. D Mateja fahrt e öppis angere Wäg. Nach re Kafipouse i me SPAR geit es Ljubljana zue. Viertel vor sächsi chöme mer a, verabschiede n is u göh a ds Trochene.
Gross use wei mer nümm, es rägnet geng no, drum ässe mer am siebni i der Lobby no Znacht.
Es isch wieder e Tag mit viel Informatione g’sy. Mer hei viel diskutiert u üser teils kontroverse Asichte teilt. Aber, eigetli hätte mer derfür nid i ds Logartal müesse fahre.
