Wenn me Slowene u ihri Identität wot verstah, muess me sech i ds Angebot vo de rund hundert Festivals, über füfzg Musee u Galerie und rund drissg Musig- u Theaterhüser vertiefe.

Föteli vo hüt:

Datum: 04.09.2025
Übernachtig: B&B Maribor
Erläbnis:

Der hütig Tag faht wie geschter a. Mer si gäng no ds Maribor, göh nam Zmorge wieder zum Bahnhof u fahre mit em Zug nach Ptuj. Nume stige mer dert nid us, mer blibe im Zug bis Murska Sobota. Das isch wieder meh bi der Gränze gäg Öschterrich.

Die Reis isch fasch pär Zuefall z stand cho. Einersits wei mer vom Land no meh g’seh, denn steit uf üsere Wunschlischte, dass mer i re Therme wei gah bade u de het öpper g’seit, in Murska Sobota heig es e schöni..

Nu guet, mer gondle also meh als e Stund dür ds Land für in Murska Sobota gah z plantsche. Mit Interrail macht me so ööppis. Natürli isch es e Söischwänzlizug, wo mer dermit fahre u es geit bös uf ds Land use, – aber es isch interressant u schön.

Murska Sobota isch de o rächt abg’läge, der Bahnhofplatz läär u vo Taxi isch da nüt z g’seh. Wil, geschter hei mer d Wyterfahrt pär Taxi planet.
Mer b’stelle eis pär Telefon, bis zur Therme sin es no siebe Kilometer.
Das klappet alles wie am Schnüerli, der Täxeler isch über die Fahrt erstunt u über d Tourischte no meh u de no us der Schwiz.

I der Therme 3000 si de mir erstunt, wie gross u o rächt suber. Usse isch es wie n es Freibad, viel Sportplatz u mehreri Becki. Ds Wasser isch nid speziell g’wermt.
Dinne «ist es etwas in die Jahre gekommen», aber nid so schlimm. Der Sozialismus drückt düre.

Ds Wasser isch schön warm u hie und da ploderet’s. (Wil Luft ichepumpet wird, nid wäg de Badegescht!) Für Heilchreft muess me scho fescht dra gloube…

Em halbi drü mache mer is wieder uf e Rückwäg u irgendwie chunnt mer dä Wäg ir Bahn no länger vor (?).

Wieder in Maribor, muess i um die sächse no i d Wöscherei gah Chleider reiche. Na me Spaziergang der Drau nah u e me feine Znacht am Wasser, chöme mer uf em Heiwäg no bi re öffentleche Balettvorfüehrig verby.

Scho no speziell u idrücklech.

• Location: 46° 40′ 53.0004″ N 16° 13′ 19.5744″ E