In Slowenie verdiene Handwärcher meh als studierti Anwält. 🙂
In Slowenie git es 205 G’meinde. Bezirke, oder e Art Kantön git es nid, aber d Zämearbeit unger de G’meinde nimmt zue.
Föteli vo hüt:
Datum: 30.08.2025
Übernachtig: City Hotel Ljubljana
Erläbnis:
We me am Morge em achti us em Hotällift stigt, im City Hotäl in Lubljanja, isch es sofort e Rundi lüter. Die viele Lüt, wo scho bim Zmorge hocke, mache es G’rüsch wie ne Schwarm Beieli. Vieli si am Ässe, vieli sueche z ässe, vieli bringe z ässe, vieli warte uf ne Platz zum ässe. Em halbi zähni isch es ruehig. Es isch e Frag vo der richtige Zyt.
Ds Wätter isch rächt guet. Mer luege hüt Ljubljana uf eigeti Fuscht a. Usg’rüschtet mit ere Reihe vo Vorschläg vo der Mateja. Aber mer göh die Sach ruehig a. E Teil vom Wäg löh mer üs vo me ‹Kavalier-Taxi‹ lah fahre. Das isch e Gratisdienscht in Ljubljana mit chlyne Elektofahrzüüg, wo me cha b’stelle. De wird me innerhalb der Innestadt umetransportiert. Em Viertel nach zähni wei mer zum Plečnik Hus. (Der Jože Plečnik isch is ja itze scho es paar Mal ‹begägnet›.)
Dä Ort isch e Art Museum; – me g’seht, wie n är g’läbt het u wo. Usserdäm sie viel vo sine Projäktstudie u Modäll usg’stellt. Mir g’fallt das Hus vo ihm. Der Igang isch schlicht, eifach. Derhinger verbirgt sech e Studier- u Schueligsteil u natürli e rächt grosse Wohnigsteil. Aschliessend erstreckt sech e Garte mit altem Boumbestand, vielne Chrüter-, Blueme- u G’müespflanze. Es Beiihüsli darf o nid fähle u n es Hundshüttli het es o.
Dernah, es isch itz sunnig, müesse mer e Glace gah schläcke. Ds Bezli, Makrame, isch idyllisch a me Kanal g’läge u d Glace isch ganz fein.
Vo hie loufe mer quer dür d Stadt bis zum Tivoli Park. Dä g’hört sowohl für die Iheimische, aber o für d Tourischte zum wichtigere Agebot hie. Es git e Vielzahl a Angebot, Plätz für fasch jedi Sportart, guet unterhalteni Spazier- u Wanderwäge, e pflegti Vegetation u zwüschedrinne chlyni Schlössli, wo itz Reschturant si. Ibettet het es Plätz für kulturelli Angebot, Freiluftusstellige aber o Konzärt. Es isch e Fröid hie!
Mir mache e Rundspaziergang u loufe de wieder i ds Zäntrum zrügg. Dert chehre mer no i u wärde de vo me G’witter überrascht. Mer warte e Viertelstung am Schärme.
Am siebni gönne mer is no e chlyne Znacht i der Lobby u am nüni mache n i Büro.
Morn geit es de wyter.
- Location: 46° 2.872′ 0″ N 14° 30.322′ 0″ E
