Datum:      31.07.2025
Ufenthalt:  Sáo Paulo

 

Umgäbig:

Erläbnis:

Isch me de einisch i der Luft, geit d Zyt schnäller ume.

Es isch fasch halbi achti, wo n ig erwache u ufstah. Packt ha n i ds Meischte scho geschter, drum blibt nume no, was im Bett isch u das isch nümm viel.

Zmorge ässe mer zäme. I bi froh, hei mer geschter no d Zyt korrigiert. mer starte ersch am zähni i Richtig Flughafe. Ehnder isch mal abg’macht worde, scho am nüni ab z fahre.

Mer chöme guet dür e Verchehr in Mendoza. Em halbi elfi stah n ig i der Check-In-Halle vom Flughafe. Vo GOL, der Flugg’sellschaft, wo mi bis Saou Paulo bringt, isch no ke Schalter b’setzt. I muess bis am Viertel nach elfi warte. De chum i als erschte dra. Geschter, wo n i oneline ha wölle ichecke, isch gar nüt g’sy.

De chunnt der Sicherheitscheck u drufabe d Passkontrolle. Es geit familiär zue im Flughafe in Mendoza.

12.30h, vo mir us chönnt me flüge. Wahnsinn, dä läng Vorlouf.

Irgendwo isch e Bueb, wo luthals brüelet. Är isch irgendwie behinderet u cha ällwäg nid angersch, dänk i. Woby, im Flugzüüg geit es de ohni, (i bi froh) i weiss nid, was i söll dänke.

Na de eis isch boarding, – e längi Zyt mit düre brüele.

Der Flug, quer dür e Kontinänt isch problemlos. Allerdings ha n i mit eme Minibüteli Chips de no nid g’läbt.

Na der Landig muess i afe mal es Omlett mit Salat ha. Dummerwys gib i em Chällner Trinkgäld. Was derzue füehrt, dass e Ag’stellte mer nachespringt, für sech z versichere, öb das stimmi.

So, em Viertel nach zähni flüge n i i erscht Ouguscht u da dermit ändet mi Reis dür Südamerika u o mi Job als Schriberling vo RedCamel. Tschüss!

Bi mir geit es de in Slowenie wyter.