Datum:      21.07.2025
Ufenthalt:  Mendoza

 

Umgäbig:

Erläbnis:

Heinze probiert g’sung z wärde u ig der Tag z g’stalte.
Zmorge ässe mer zäme, – er isch gäng no nid hundert.

Der Tagesablouf isch hüt vo Zuefälligkeite prägt. Am Morge Wösch i d Lavanderia bringe, de zum Coiffeur u chley dür d Stadt schlürme.
Zmittag isse n i e Vegi-Lasagne bi der Anna gägenüber. Isch total fein, aber nid nume billig.

Uf e Namittag starte n i zu me Parkb’suech. Der Parque General San Martin schynt e tolle Ort z sy. Zersch steit aber der Wäg dert häre a. I ha die letschte Monet nid übermässig viel müesse loufe, drum gah n i z Fuess i dä Park.

Mir fallt uf, wie schadhaft vieli Sache si. D Fuesswäge si zwar vielfach plättlet, aber de het es Löcher drin, Absätz wo äuä nid sötte si, o d Hüser si schadhaft. Die argentineschi Wirtschaft erholi sech anschynend, in Mendoza isch das no nid überall acho.

D Stadt mit ihrne Aleeä g’fallt mer, der Verchehr konzentriert sech uf Houptachse, i de Sytestrasse het es weniger, aber geng no g’nue.
Im Park acho, stune n i ab der Grössi. Kes Wunder, isch ds Outo o da im Vordergrund als Fortbewegigsmittel.

E wichtige Teil vom Park si all die Stadie. Natürli het es mehreri Fuessballstadie, der Strass nah si mindeschtens es halb Dotze Tennisklüb. Im Park isch e künschtleche See, wo d Ruederer ihre Riesig Klub hei, i stuune.
Sport schynt in Mendoza e ganz grosse Stellewärt z ha. Vielli Fitnetssegge stöh, nid nume im Park, bereit u wärde o g’nutzt. Löifer i allne Altersgruppe si ungerwägs, aber es het o VelofahrerInne u Rollbrättler, – es aktivs Volk hie.

Im Park b’suechi zersch der Wältbrunne. Dä zeigt aber nid die nöischti Sicht uf die Wält 😠. Denn wett i dä See umrunde, was mer wäg em Böötliklub nid g’lingt. Am Schluss möcht i no d Museo de Ciencias gah erkunde. Hüt isch Mänti, den hei si zu 🫤.

Uf em Wäg zrügg fallt mer die offeti Kanalisation uf. Schynt mer gar nid so dumm u schynt o suber. Uf der andere Site vo der Strass fliesst der Aroyo. I wächsle d Strassesite. D Hüser hie si idyllisch g’läge, über n es Brüggli erreichbar; – aber vieli si unbewohnt, zum Verchouf a g’schribe. U der Aroyo isch e Kloake, grauschwarzes Wasser mit allem Mügleche drin.
Da möcht i o nid wohne.

So, itz ha n i mi Kafi ustrunke u ds Gipfeli isch g’gässe.
Hinech muess i no gah d Wösch reiche; u denn vieli Idrück verarbeite.