- Location: 19° 2′ 36.8898″ S 65° 15′ 23.95″ W
Vo der grosse Wyti i die grossi Stadt
Datum: 14.06.2025
Ufenthalt: Sucre
Umgäbig:
Erläbnis:
Es wird o wieder zähni, aber de fahre mer us Macha ab. Bis denn hei mer ds ganze Prozedere mit zmörgele u abwäsche hinger is. Es het wieder Toast u hüt Hung g’gäh, u natürli Kafi.
Fasch alli, wo uf em Platz verby chöme, si seehr interressiert. Der Gaschocher, der Bänzinchocher, d Kaffeemaschine, der Toaster, d Inneirichtig vom Kamel, alles isch interressant u git z rede. Teilwys wärde mer us Dischtanz verhandlet, teils chöme si i Grüppeli derhär u frage.
Üses Ziel hüt isch d Houptstadt Sucre. Das si 114 Kilometer dür gebirgegi Landschaft.
Es Stück nach ‹Sauce Mayu Centre ‹chunnt es Schild u ne Abzweigig nach ‹Tanga Tanga›. Es söu dert e alti Chilche gäh u usserdäm uralti Felszeichnige u so. Mer beschliesse, der Fäldwäg ache z fahre. Ersch nach öppe füfzg Meter zeigt sech, dass es stotzig isch, steinig, links e Felswang, rächts e Abgrund; – i muess mi guet häbe.
Mer fahre dürab a farbige Felse verby, unger isch e Furt dür n es Flüssli u uf der angere Site vom Tal ueche dür Wiler vo Burelüt.
Churz g’seit, Felsbilder g’seh mer kener, derfür begägne mer ere Landwirtschaft wie bi üs vor 150 Jahr.
Ds Chorn wird verusse, uf em Dröschplatz mit Escht u Zwisle us de Ähri g’schlage u der Luft hilt Spröi vom Chorn z trenne.
Uf der Rückfahrt vernähme mer, dsss die Felsbilder nume z Fuess z erreiche sige.
Zrügg chöme mer nume mit warte. Zmitts uf em Wäg steit e Vehbänne u der Fahrer springt a üs verby wieder zu de Burehüser ueche.
No bevor mer grösser z’rügg g’fahre si, chunnt er de wieder, mit ere Schafherde, ere grosse Balkewaag u me Wageheber. D Schaf göh ihrer Wäge, d Waag u der Heber wärde ufg’lade un er fahrt wyter. Wo das Hindernis wäg isch, fahre mer wieder uf d Houptstrass zrügg.
Will mer hüt viel fotografiert hei, «mit üs zwene chunnt me nid vorwärts», drückt Heinze gäge Sucre zue uf d Tube.
Mer g’seh unändlech Motiv, – verzichte aber meischtens uf ds Fötele.
Churz vor Sucre fahre mer dür ne richtige Wald mit grosse Böim. Uf 2800 MüM bietet die Stsdt e imposante Ablick, isch Universitätsstadt u die wichtegeri vo zwo Houptstädt. (La Paz: Verwaltung – Sucre: Rächt u G’richt)
Wo mer in Sucre a chöme isch es riesig’s Fescht im Gang. Das het aber zur Folg, dass e grosse Teil vo de Strasse g’sperrt si u mer Müehi hei, üsi Ungerkunft z finge.
Schlussäntlige chöme mer a u si rächt z fride.
Zum Znacht göh mer no e Pizza gah ha, de Büro -u de Schlafsack.