Bolivia Tag 105


Wo isch Diesel?

Datum:      13.06.2025
Ufenthalt:  Macha

 

Umgäbig:

blank

blank

blank

blank

Erläbnis:

Ja, es isch wieder fasch zähni, bis mer vo Oruro wägchöme. Ds Hotäl het zwar g’choschtet, derfür isch es warm u suber g’sy. Mer hei die Nacht chönne nacheschaffe, was isch blibe lige.

Ds Zmorge isch o sehr guet, besser als in La Paz.

Mit der Abfahrt vom Hotäl faht o d Suechi nach Diesel wieder a. Mer müesse, nach ere Empfählig, rund ei e halb Kilometer fahre. Bi dere Tankstell gäb es de.

Wo mer dert häre chöme merke mer, dass mer da am Abe vorhär wägg’schickt si worde. Ds hütige Pärsonal het es Isee. Mer chöi i die kilometerlängi Schlange vo Laschtwäge icherütsche u fülle der Tank. Über huntert Liter, der Tankwart luegt läng; – u mer si e Sorg los.

Uf em Wäg gäg Sucre chöme mer in Poopo bi me Bärgbougebiet düre. Verschiedenschti Erz wärde abb’oue u d Umwält lidet.Ds Wasser vom glichnamige See isch starch verschmutzt. Usserdäm het d Landwirtschaft übermässig viel Wasser entnoh. Verantwortlech wird d Regierig g’macht. Aber äbe.

In Challapata wärde mer g’stoppet. Im Ort proteschtiere Lüt u hei d Strass g’sperrt. Mer fahre e stoubige Umwäg u chöme so wyter.

In Cruca Culta ässe mer. Für ei e halb Doller git es e G’müessuppe u nachhär e Täller Ris. Derzue e paar G’müesli, Brathärdöpfle u Eier mit ere kurlige Sosse.

Vo hie a fahre ig es Stück u Heinze cha sech erhole. D Landschaft isch zwar grandios, wird de aber mit der Zyt g’lych längwilig. D Strass isch über längi Zyt grad. Ersch im zweite Teil si mer de wieder im Gebirge.

Hie wird o proteschtiert u zwar gäge d Treibstoffpriise.
Queer über d Strass liege Reihe vo grosse Steine. Wo kener Lüt derby si, het es versetzt Durchfahrte. Es het aber o Sperre, wo Lüt si und d Fahrzüüg je nach Luun düre lah.

Im Dörfli Macha übernachte mer uf em Plaza Central, wieder näb em Polizeiposchte. I schlüfe scho früech i mis Turmzimmer. I grippele chley.

 

Schreiben Sie einen Kommentar

Ihre E-Mail-Adresse wird nicht veröffentlicht. Erforderliche Felder sind mit * markiert