Ängu 23-4
Weniger stotzig, besseri Strässli, das ha mer für hüt vorg’no.
I gah wieder mal uf d Klewenalp u loufe Richtig Buochs.
Poschi bis Beckeried, de zur Klewenalpbahn ueche. I ha geschter ds Biliee über d SBB App g’chouft. Da derfür mache si Reklame. Ds Ylasstor für d Bahn kennt aber der QR Code nid, me muess zersch gah tusche. Der Strichcode uf em Chärtli tuet de ds Töri uf.
Uf der Klewenalp isch wie geng, eifach no es paar Hüsli meh, wo im Summer zue si.
I loufe gäge Weschte u verloufe mi scho es erschts Mal. Das Wägli wo abzweigt isch munzig u zmitts i me Zantihansefäld. I verwütsch es u vo itz a geit’s nidsi. Zersch alls über Weide. I stune, wie d Grasnarbe verstoche isch. Da hätte d Senne ehnder müesse luege.
Zwüschedüre mache n i es Pöiseli, trinke, isse lose de Vögu u de Chuehglogge zue. Luege der See a u bewundere die verschiedene Blau u Grüen, oder Silber u wiss, je nach Sunne Wulche Luft u Standpunkt.
Da hinger Buochs gäge Weschte het es so öppis wie Gwitterwulche (später, wenn ig z Buochs bi, tröpfelet ’s sogar chley). Aber i ha wieder einisch paar Super-schöni Wandertage, hie ds Emmette.
Lang triffe n i niemer. Öppe so by ‚Eggerüti‘ änderet sech das. Der Alpwäg isch usb’boue worde ( äuä ersch dä Früehlig). Es g’seht ganz strub us. Zwar isch bis itz nume e Steibelag, – öb das ächt wird länge? Die a g’sprocheni Chundschaft si d Biker. Vo dene het es scho ganz viel da, – eifachi Velo suecht mer vergäbe. Es si Supermaschine wo g’fahre wärde, viel mit Motorungerstützig u Kabong’stell … Wird das der Ersatzsport hie? Es wird ömu grandios a g’richtet.
Me liest ja gäng wie meh vo Orte mit zweni Schnee. D Klewenalp het e grandios usb’bounigi Wintersport-Infrastruktur. Emmette isch eigetli e Wintersportort; ; – aber zweni höch g’läge.
Der Ort ligt öppe 750m ü.M. Die verschidene Lifte bringe d Lüt uf zwölf bis sächzahhundert Meter über Meer. (Par wenegi Lift witer hinger göh no höcher.) Verglichbar isch das öppe mit der Axalp u het eigetli ke Wintersportzuekunft. Auso de halt: Biker, u g’rad mit der grosse Chelle.
Je wyter ache dass i chume, desto meh Strässli si teeret. Der Zmittagshalt mache n i ame Teichli, ( öppe uf tuusig Meter), wo i re Strassekurve a g’leit worde isch. Der Grillstand u d Tische si vo re ebikende Mueter mit ihrem driisgjährige, ebikende Suun beleit, wo i eir Lutsterchi Internas vo sech gäh. Zum Glück het es grossi Steine u mis Zmittag muess nid «tschsch-tschsch» bruzlet si. D Reklamekampagne si ke Säge!
I chume guet vorwärts. Zytewis finge m i sogar naturbelassni Strässli zum Loufe.
D Verbouige a de Bäch zeige, dass da mängisch e rächte Strom nidsi chunnt.
Vom Ankebärg füehrt der Wäg es schön’s Bitzli dür blüehiegi Matte: total guet.
Viel vo de Hüser hie obe wärde zwar no bewohnt, aber nid vo Buure. D Ställ u angeri Ökonomiegeböid si umg’nutzt.
Mi Wäg geit wieder im oder am Wald nah gäge Buochs. Ds Obersassi isch e Grossbuur. I dänke, dä het o e grossteil vom Land hie obe. Läck het dä e Stall b’boue. Dä isch äuä guet ungerstützt worde. Aber er isch nid allei. Je wyter ig gäge Ort ache chume, desto grösser si d Höf: Milch u Fleisch – Grossproduzänte. Zwüsche dene u Buochs verlouft no d Outobahn. O nid es Glanzprojekt, – aber es het äuä Gäld b’bracht.
Ja ude bi n i bi der Schiffländte vo Buochs. Es isch no nid drü. E fründlegi jungi Frou seit mer, dass ds nächschte Schiff em zwänzg vor sächsi fahri. Ouuuu! I ha vorhar doch nid g’luegt. I ha a g’noh, das sig öppe so wie Beckeried, aber nüüt so.
I der Ortschaft isch alls zue. D Beize wo offe hei g’luschte mi nid. I beschliesse, mit em Poschi z fahre. Ersch bi der Poscht merke n ig, dass ig hüt ja ganztägig «Fronleichnahm» i treit ha. Ja so öppis!
Der Bus bringt mi bis Beckeried u de bis Emmette. I bi früech, aber de längt’s guet, e länge Tägscht z schribe. 😉
