Ängu 23-3
I bi chley spät drann. Kafi am Morge tuet guet u nimmt Sorge 😉 
Die Rigi, vürnähm u chley snobby; – i gah uf Hingerbärge. Der Start isch wie geschter, nume fahre n i hüt i Richtig Beckeried. Bis ‚Post‘, de über d Strass u warte uf ds Schiff. Das chunnt, de Buochs, Ennetbürgen u bis Vitznou.
Dert stige n i us u loufe ds Dorf düruf, bis d Gondubahn ‚Hinterbergen‘ chunnt. Ds Kafi striiche n i, es het ja es Reschturant dobe.
Das isch o e Sälbschtbedienigsbahn, aber mit Zuesatz. We der Outomat nid funktioniert u ‚in Betrieb‘ uflüchtet, muess me i d Gondle i stige u uf e Chnopf ‚Start‘ drücke. De isch nähmli öpper dobe u kassiert.
D Bedienig isch öppe achzgi u total vif. Mer palavere chley u i loufe obsi zur Wirtschaft. Aber ohä, die hei zue; – nu ja, de git es de am Schluss Koffein.
Irgendeinisch, bim uecheloufe, ändere i miner Plän. I gloube, i loufe de i Richtig Gersau ache. Uf der Fälmisegg obe ligt scho eine uf me Sunneschrage. I höckle mi häre u gah es wyters h Mal über d Büecher zu mine Plän. Mi düecht, so fuul umelige cha jede. I stige uf e Vitznoustock/Gersoustock ueche.
Das isch zersch e breite Wäg, aber mordiomässig stotzig. I motore wie ne Äbi ueche. (Ds Frolein, wo ache chunnt, lächlet nume. Isch si ächt ganz obe g’sy? Si isch, bis fasch zoberscht, die Einzig wo mer begägnet.)
Der Wäg blibt stotzig, aber wird änger. Meischtens verlouft er im Wald u beidsitig geit es ache. Zytewys isch das Wägli am Hang a g’chläbt, geit im Zickzack obsi, oder isch unger Felswäng zuechebüschelet.
Stäcke ha n i hüt für a z gäh. Das längt aber nid gäng, – mängisch brucht’s no Chnöi, Häng u weiss nid was. Ds Wägli isch mängisch schön, usb’bout u sicher u mängisch brucht’s Fantasie; – zum Glück isch d Margierig guet. Wyter obe wird es zytewis steinig, u we ds Wägli nume no driisg Centimeter isch, bevor es nidsi geit, het es zum Glück gueti Seili a der Felswand. Wo nume no Loch isch, het es Gitterröscht. Dä, wo mer hie obe begägnet, isch zum Glück e schmale Wurf u i zieh der Buuch i; – mer chöme näbe nang verby. Churz unger em Gipfu isch e ziemlegi Leitere i passt.
Die ueche (vorhär d Stäcke versorge), dobe e G’röllhalde queere, no einisch zäh Meter uf allne Viere obsi u i bi a mim Mittagspunkt. Über d Krete isch es Wäldli u ibcha mi wunderbar verpflege. D Vögu hie si viel weniger schüch u ässe fasch mit.
Links der Votznoustock, rächts dä vo Gersou; – eigetli si beides nume Chnubeli mit ere Antenne druffe. Aber immerhin vierzähhundertfüfzg Meter!
Ds Wägli nidsi, we me däm so darf säge, verlouft knapp der Krete nah i me Zickzack. Wyter unger isch es zytewys es halb’s Bachbett. Gross Chempe erschwäre eim ds Vorwärtscho. Woby, vorwärt’s, oder nidsi gieng’s vo sälber, we n is liess. 😉
De chöme Streckene, wo mittler Chempe, aber los; – me muess ufpasse, dass me nid i ds Rütsche chunnt. Aber itze, mit jedem Schritt chunnt Gersou nächer. Nach ‚oberem Urmi‘ chiem ‚mittel Urmi‘, borhär zweige i aber i Richtig ‚Wissistei‘. Dert sig es Reschturant mit Kafi. – Scho vo wytem g’seh n ig das Schild [geschlossen]. 😉
 |
 |
 |
 |
 |
 |
Ja nu de halt, de äbe dunger. I chume öppe Viertel na de Viere uf Gersau. Ds Schiff fahrtrsch zäh ab füfi. Das längt für ne Kafi u zwee Chugle Beerisorbet.
D Rigibahn chunnt, e Strom vo Touris fliesst i Richtig Ländte. Zum Glück fahrt zsch es Schiff gäge Luzärn. No so isch mis gäge Än etbürge (huss wie grusig), Buochs, Beckeried voll wie nume öppis.
I schribe mis B’richtli u ds Poschi (oder hie der Bus) chunnt gly.
Gäg die achte hocke n i bim Znacht u dä Tag isch scho fasch G’schicht.😉
