Ängu 23-1

Emmette kennt niemer. Das wird mer geng wieder bewusst, wen ig verzelle, i göng dert häre i d Ferie.
So sig ’s de halt. Mir g’fallt es dert. – Nid wäg em Dorf. Das isch nid viel B’sundersch. Es Strassedorf, mit mehrere Schwärpunkte, wo o wieder fasch es Dörfli sy. Mit de Lüt ha n i o weni z tüe. Die Iheimische si ziemli verschlosse u d Tourischte zieht es i alli Richtige.
Nei, d Landschaft g’fallt mer. – Der Wow – Effekt het me zwar nid im Dorf, – aber es isch Usgangspunkt für settig Effekte.

Itz gondle ig also dür ds Ämmital für ne knappi Wuche Emmette.
(Irgendwie isch e PH Tag. Scho ds Buchsi g’seh n ig der ersch Ehemalig vo denn. De triff i der Urs Gfeller, – besser är kennt mi im Zug. Der Urs het Beratig für Lehrchräft g’leitet.)

Gäge Luzärn zue wird es waldiger, – aber no so schön. Es wird allethalbe b’boue. Drum chöme mer mitf füf Minute Verspätig a u ds Umstige wird de chley äng. Aber es längt u i schoukle mit der Zätralbahn i Richtig Stans.

O dert isch d Busstation hinger me Bouzuun. D Witerfahrt söll e halb Stung speter sy, drum trink i es Kafii m «s’Buffet Beck-Away Bistro Bar«. (Dert bi n i nid ds erscht Mal 😉)
Uf d Zyt gah n i ga sueche wo dä Bus haltet. 311b isch zwar a g’schribe, aber da haltet nüt. Bi der Haltestell 311a isch e Bus, der Schofför seit mer, i sig richtig bi ihm. Fasch zäh Minute nach Abfahrtszyt, der Bus isch total voll, müesse mer wieder usstyge. Der Bus heig es technisches Problem. Nach ere Viertelstund chunnt der Ersatzbus: alles wieder i stige. D Fahrt isch de ziemli rasant. Bis Emmette het er füf Minute ufg’holt.

I berchume mis ‹alte› Zimmer 301. Für dä Tag chley lah us z klinge gah n i gah loufe. Nume es Rundeli em Bärg nah.

Schön, wie d Matte blüehie. D Ussicht uf e See ache isch klar u schön. Es het Wulche u Gleitschirmler en Masse. Ungerwäg› triff i e Gruppe Meckertante mit ihrer Jungmannschaft.

Nach chley gänggele gah n i mi im Zimmer gah irichte u no es par Telefon mache.

Em halbi sibni gah n i ache gah Znacht ässe. Es Salätli später, so gäg die achte, zieh n i mi zrügg. E Bus voll Ängländer muess verpflegt si.