Tag 1, 4. Mai 23
Süüferli, so gäg die halbe nüüne bi n i ds Buchsi. Es Usflügli i ds Tessin isch programmiert. Über Bärn, Luzärn gäge Gotthard bi n i am Mittag scho in Locarno. Scho verruckt, wie schnäll me isch u wie weni dass me’s macht.
Wenn i nid grad i pfuset bi, tue n i d Umgäbig beobachte. U derby mache mer so miner Gedank Zwöi jungi, pflegti Froue rede über ihri Usbildig. I stune über ihri Sprach, i fasch jedem Satz chunnt es «hueregeil» oder es «huereguet» vor. Wo hei die g’lehrt rede? .Was hei die für ne Chinderstube g’ha? Ab Luzärn si de Mönsche mit Behinderig im Wage. Da stuni höchschtens wie träffend die rede;- früsch vo der Läbere wäg. – Die zwo ältere Dame im Tessin hei o nid e stubereini Verhandlig über ihrer Manne g’füehrt. Bi n ig ächt z empfindlig?
Nu es isch ömu nid längwylig worde. Zwölfi vierzäh fahre n ig ds Locarno i. Der Wäg zum Hotäl kenne n i sehr guet. Uf em Piazza grande wär Märit. Aber i wott i Falkepark.
Geschter ha n i im Internet es Biliê g’chouft u g’seh, dass da o es Resturant isch. Dert git es Spargleravioli für mi zum Zmittag.
Ds Ergäbnis isch zwar tüür, aber nume begränzt exquisit (25.-) u o der Kafi isch mit drüüfüfzg nid billig für n es halb’s Bächerli voll. Aber, – i sött nid jammere u motze. D Ikünft während der Coronazyt si äuä nid rosig g’sy; – u my Ränte isch o denn cho.
Nach em Ässe mache n i e Rundgang dür e Vogelpark. D Volière si nid g’rad üppig u ne Reihe vo de Tier sy allei im Chäfig. Z fride g’seht angersch us.
Uf die drüü mache mi zum Showplatz uf u am drüü fajt de e Tierpräsentation a. Hie es par Idrück. Mi düecht, die mache das gar nid so schlächt. Mir schynt, die möge enang.
Natürli wärde d Vögel mit Fueter g’löökt. Aber no denn: be idruckend, was si leischte u chöi. Die Show zeige si jede Tag, – e chlyne Usglych für die änge Volière. Zwüschedüre sige o scho Vögel ab; – aber si syge gäng wieder cho 😉
Öppis nah de Viere isch fertig u i loufe wieder zrügg zur Piazza. Der Märit isch fasch fertig. I loufe trorzdäm no drüber u gänggele e Huet. Zrügg bim Hotäl checke n i ii u tue de im Zimmer Föteli sortiere. Später wirde n i dä Bytrag brünzle.
Em halbi sibni gah n i zum Znacht. Es fein’s Steipilzrisotto macht mi rächt glücklech, derzue spile paar jungi Type live alti Schnulze uf em Platz usse. Es isch ja o fasch e Summerabe.
E g’müetleche erschte Tag im Tessin.
