19.5.Suasar
I loufe uf me Höhewäg vo Le Prese gäge Poschiavo zue u mit mir hunderttuusig grossi schwarzi Waldameisi. Toll! Wüsse ächt die, wo si häre wei?
Auso, – so viu Usduur hei si nid g’ha, Ändi Wald ha se nümm g’seh.
Wo n ig am haubi sibni erwachet bi, isch der Himmu zue g’sy. Bedeckt u grau, so het das usg’seh – wie wenn hüt nid unbedingt e Wandertag wär. I bi no chley im Zimmer ume g’sürmlet. Am haubi achti isch de katholische Alarm g’lüte worde. Diräkt hinger mym Badzimmer isch es los g’gange.
De bi n i gah zmörgele u die Lüt hie hei sech alli Müehi g’gäh, dass mer a nüt manglet.
So öppe em halbi zähni ha mi de ufg’macht us däm Tag öppis z mache. Es het uftah. Zwar si no Wulche, aber es wird im Louf vom Tag geng wie schöner!
Der Panoramawäg vo Le Prese, wo zytewys nume es Hühnerwägli isch u ersch no g’fährli, geit em Hang nah i Richtig Poschiavo. Toll aber teilwys o stotzig wie e Hagu. Guet ha n i die höche Schueh. U – i chume i ds Chyche. 😉
Hüt isch der Tag vo de Klematis. Der ganz Panoramawäg, aber o höcher obe, het es wildi Klematis. I troue mine Ouge fasch nid. Wunderschön, wie das hie blüehit.
Die ganz Tour g’höre n i näb de Vögu d Züg wo ds Tal düruf u dürab pfiiffe.
Ja, wär isch es, – scho lang nümm so dütlech g’hört. Suecht äuä e Frou. 😉
Zwüschedüre muess o d Chilche chley lüte. Wie isch ds läbe hie obe ächt vor paar hundert Jahr g’sy. Ömu d Züüg hei denn no es id pfiffe.
Öppe uf der Höchi vo Pagnocini stigt der Wäg u i muess zytewys uf der Teerete loufe. I chume uf Plaz da Suasar. E chlyni Sidlig wo n ig no nid useg’funge ha, werum si so heisst. I vermuete Suasar isch es G’schlächt, e Name. I chume de speter ds Suasar Daint u ds Suasar Dafo verby. Beides si Meiesäss u hüt leider zum Teil nume no touristisch. O der letsch Ort wo n i begägne, Torn, het nümm iheimeschi Bewohner u we da no büürlet wird.
So, zum Glück geit es wieder nidsi. Derfür schlaht es itz i d Chnöi u heiss isch es o scho lang. Dass i nid z früech a See ache chume u dert a d Verbindig nach Italie, nime n i wieder ds Panoramawägli. Zwar si überall Böim u vo Panorama isch nid viel, aber i loufe gärn hie. 
Uf mire Tour hüt ha n i zwöi Löifer, drü Outo u ne fuule Hung begägnet. Me merkt, es isch nid Seson. Derby chönnt me hie Steimüürli studiere. Trochemüürli git es wie Sand am Meer. Wär het die ächt alli ufbigelet; – die si nid geschter entstande. 
Im Louf vom Nami chume n i wieder uf Le Prese u bi Lardis im Garte git es e Liter chalt’s Wasser u drufabe es Trio vo iischige Chugle. 😉
U itz bi n i «im Büro» – bau git es Znacht u dusse fahrt der Panoramaexpress dür d Strass.
Rückblick:
(tsmap track=196 zoom:2 continuous=n height=350px)