Niederbaue – Wandeli – Klewenalp – Stockhütte

E perfekte u der letscht Wandertag z Emmette. Am Morge isch es chley glaarig g’sy am Himmu, aber es wird o hüt geng wie schöner ( u wärmer 😉/.

Zum Abschluss mache n i e ähnlechi Wanderig wie ni vor me Jahr mal g’macht ha.
I höckle wieder z hinderscht im Choltal, im Wandeli u isse Zmittag. E schöne Platz hie.

Aber mal vo Afang a. I bi am Morge em halbi nüni mit em Bähnli uf e Niederbaue ueche. Dä kenne n i afe. Vo dert bi n i dür d Niederbauenalp gäge Fulbärg zu.Der Ufstieg dert ueche isch de aber gar nid ohni. Ängi Wägli, steili Stägli u gaaaanz töifi Abhäng. I merke, dass mer d Höchi, oder besser d Abgründ gäng wie meh usmacht. Nu de, wil i mi guet muess konzentriere, wo n ig d Füess härestelle, merk i die Abgründ de doch nid so.

Hie füehrt o der Wildbeobachtigswäg düre. Aber so, em Vormittag, si d Gämsi, d Steiböck, d Murmeli und Co irgendwo versteckt u n i chume z spät. Aber das macht nüt, i bi ja nid wäg dene da.Vom Fulbärg loufe n i d Bärgmatte ache, chume dür d Mättematt u später de bim Geissbüehl verby. Bi der Lang Hütte het es schotteschi Strubeli un i bi froh dert guet düre z cho. D Muetterchüeh mit ihrne überlänge Hörner si nid z ungerschetze.

Itz chunnt no d Hütte Platteschutz u nachhär d Winterschle (wär het sech ächt die Näme für die Hütte usdänkt).So, u itz faht der G’röllchegel vom Choltal a. U dert, zhingerscht, zoberscht unger der Felswand höckle n ig bim Zmittag.Vor eme Jahr isch es rägnerisch g’sy u het fasch niemer ungerwäg’s g’ha. Hüt isch das andersch. Es het meh, aber isch nid schlimm.

Scho so um die eine bi n i bi der Lochhütte. Mi düecht, i mög rächt guet loufe. Drum gah ni nid i Richtig Stockhütte füre. I loufe uf d Klewenalp. Zwüsche Heitibüehl u Klewestock geit es dür nes Täli u dernah uf ds Tannbüehl ueche. Scho chlei heiss, es bruucht mängi Pouse. (Es chlyses Meiteli het mi hüt g’fragt, ob i o Pöiseli machi 😉) I ha i der Zwüschezyt ds G’füehl i loufi uf ner Outobahn, der Wanderwäg isch breit u äben. Dämentsprächend isch o d Klientel, wo hie ungerwägs isch. Viel Dame u Herre u Familie mit Chinderwäge; – die müesse ja o irgendwo sy.Uf der Klewenalp (wo us vielne Feriehüsli u Wirtschaftene besteit) wirde ni gitig 😉. We n i jetz hie ache fahre, de müesst i ds Beckeried ds Poschtouto näh… I beschliesse, wiu i ja so guet mah, über e Hoger zur Stockhütte z loufe.Das geit aues guet, bis DIE Abzweigig chunnt: die verpasse ni! I loufe wyter u merke de, dass i uf em Klewenalper Pflanzewäg bi. Dä füehrt um e Klewestock ume. Wiu i sch z wyt bi, mache n i die Ehrerundi fertig ( u lehre viu Interessants über Blüemli u Tier).
I fah drum uf der Klewenalp no einisch a, diesmal nimi der richtig Wäg u füehre mi Wanderig bis zur Stockhütte furt.

Dert nim i es Mineral: 5.- Uiii, nüt isch mit Poschtoutogäld spare.
Mit em Gondeli fahre n i g’müetlech bis Emmette.

Da demit ha n i hüt die lengschti Tour g’macht. Subi! 😉