Emmette – Seelisbärg – Stützbärg
So, i muess chley motze. Es louft zwar alles nach Wätterb’richt, – fasch uf d Minute g’nau, aber es müesst i hüt nid scho em Morge rägne. – Nu de haut! Me seit, Räge machi schön … i ha mi Rägehuet u d Jagge derby.
I gah hüt zum Seelisbärgseeli u da wär schön’s Wätter ‚o no schön‘. Hoffetli tuet’s uf!
Zwänzg ab nüni fahrt d Poschtouto gäge Seelisbärg zue. I stige bi der Haltestell Geisswäg us u loufe gäge See abe. O hie wimmlet’s vo Verbot.
Ds Seeli isch nid gross, het e wunderbari Smaragdfarb u dernäbe isch e Zältplatz (ohni Outozuefahrt). Dä Teil isch afe mal vo de Grundeitetümer g’sperrt. I loufe uf me Charrwäg em Ufer na.
Aber nach drühundert Meter isch o wieder es Verbot. (Ds Manndli, wo n ig de speter triffe, verzellt vo wildem Cämpiere u äbesettigem Bade … de müess me doch sperre.) Auso de zrügg u wieder der Hang nah obsi.
Es isch bewölkt u hie und da blinzlet d Sunne düre. U de faht’s a tröpfele. Macht nüt, ha ja e Jagge 😉. Das Bitzeli hört aber uf, wo n i d Jagge anne ha …
Seelisbärg isch ganz angersch, als i mir das vorg’stellt ha. D Hüser stöh, wie übrigens o ds Emmette im alte Teil, wiit usenang. Irgendwie entsteit niene so rächt es Dörfli, – es isch e Streusiedlig.
Vom Seeli ueche, chume n i i Dorfteil Schmidig. Vo dert loufe n ig der Houptstrass nah, was mer aber nid so wott g’falle. Im Oberdorf zweige n i ab u gah der Bärg düruf. (Wär ig der Houptstrass nah, de wär ig bim Hotäl Sunnebärg verby cho. De hätt i villicht no der Geischt vom Yogi troffe bim Usflüge … 😉)
Der Bärgewäg füehrt mi uf ne Panoramawäg, mit ere prächtige Ussicht. Unger mir si g’rad zwe grossi Burehöf, da chunnt mer e alte (no ältere) Mano e gäge. I säge zue n ihm, dass die zwe da unger äuä guet binang sige. Potz faht das Mannli a rede, wie ds Bure hie schwär sig … i wirde ne fasch nümm los. 😉
Mi Wäg fürhrt mi i Richtig Chiledorf. Vo wytem g’seh ni no ds «Yogi – Dachspitzli», aber flüge tuet niemer. Das Hotäl wärdi ja o verchouft, – wenn es nid scho isch. Im Chiledorf steit die imposanti Dorfchile vo Seelisbärg. Hie g’seh n itz o wieder der Vierwaldstättersee u derhinger d Mythespitze. (Chönnt g’rad zu Victorinox übere.) Vo hie a git es vorerscht weni angersch als d Outostrass, wo n i cha loufe. Es het weni Verchehr gäge ds Äbnet zue. Ei rächt grossi, teereti Strass, mit vielne Parkplätz, wo überall steit, me dörf nume zwo Stund parkiere. 😉 D Ussicht isch grandios, i g’seh Beckeried, Buochs, Änetbürge; – aber mit der Zyt wird es chley längwilig. Trotzdäm isse n i hie uf eme Bänkli Zmittag u g’niesse’s. Hie merke n i, dass i nüüt z Trinke g’chouft ha. 😉
So öppe bi Äbnet zweige n i i Wald ab. I probiere so ungefähr der Kantonsgränze nah, quer dür d Landschaft zu me ne Waldwäg z cho, wo da irgendwo syg.
Vollträffer: i chume zu me Platz, wo sech Holzer i g’richtet hei, mit Wohnwage, Tische u Bänk, me riisige Brätliplatz … Eifach g’rad chley meh, als es normals Holzerlager nötig het, – o d Schwizerfahne fählt nid. Vo da füehrt e breit usboune Waldwäg i Richtig Haselholzbode. Die Bärgsite hie heisst Stützbärg. Mängisch brucht i g’wüss wäger e Stützi. We der Waldwäg vorhär e Fahrwäg isch g’sy, isch das itze fasch ehnder e Geissewäg.
Die par Lüt wo mer e gäge chöme, cha me fasch nid chrütze. U mängisch schlänglet sech das Wägli em Felse nah, me gloubt fasch nid, dass das cha ha. D Stägetritte si o wieder nid für churzi Bei. Zwüschedüre g’seht me zum See ache, oder het e wunderbari Wytsicht.
Bim Haselholzbode zweigt e Wäg i d Risleteschlucht ab, i loufe aber wyter gäge Sonnwil zue u der Teerstrass nah bi der Moosegg düre (hie wär der Tunnu wieder g’rad unger üs).
Dür ds Sagedorf (wo nüt mit ere Saag z tüe het) chume n i wieder uf Emmette u muess mal richtig trinke. 😉 Ds Wätter isch hüt geng wie schöner worde, – es git e tolle Abe.
Es isch der längscht Usflug g’sy, wo n i bis itze g’macht ha, trotzdäm bi n i scho am drüü zrügg. Trinkwasser isch aziehend. 😉
