21.5. Partenza

Heireis, schad, aber es muess sy. Guet g’schlafe, tröimt vo der Zegge, haubwäg’s erholt bi me usgiebige Zmorge, denn verusse der geschtrig Tag z Fade g’schlage für WordPress u g’stunet, wie schnäll ds Internet da isch, dernah gah kömerle u de zum Bahnhof loufe. Bahnhof isch zwar viel g’seit, in Le Prese isch das nid viel meh aus e Tafele u ne Steibank.

I bi z früech, em Halbi fahrt no eine nach Tirano. Le Prese isch es Durchfahrtsdorf, es het heillos viel Töffe wo här u hin fahre. Aber i bi ja o a der Houptstrass. Uf der Via Vegia, der hingere Gass da wär’s ruehiger. Derfür het es dert kener Läde u Hotel … D Hotel hie läbe vo däm Durchgangsvercher. Ds Hotel Le Prese, La Romantica, Raselli, ds Albergo Lardi u wie si alli heisse, si tutti quanti a der Houptstrass.

Derfür fahre eim all die Verchehrsmittel fasch über e Täller.

Mi Abfahrt klappet tadellos. Zwar ha n i ds Le Prese ke Sitzplatz, aber wo de ds Poschiavo e italjäneschi Grossfamilie usstigt, isch ds Abteil fasch läär u i cha mi breit mache. Ussert mir si nume no zwe älter Type, wo irgend so es räto-italo-romanisch rede. Si benähme sech abwr wie Touris. Si das ächt Heimwehbündner?

Alp Grüm, es Erläbnis für Touris. Da wird g’fötelet wie z Blitz. Wär luegt ächt all die Bildli a, frag i mi?

U de: alles zrügg i d Wäge, churzi Drückete, letschti Schnappschüss, alles isch wieder dinne u de chunnt d Durchsag, me müessi der nächscht Zug abwarte. 😉

Bernina Diavolezza isch beidruckend u abstossend zugliich. Was muess da im Winter für ne Märit si u – wie isch ds Bild im Summer troschtlos.

Allegra St. Moritz, mondän, schicki, u heillos usländisch. I muess umstige i Richtig Landquart. Mir fallt uf, dass ig uf der Härereis, aber o hüt Morge niene ds Bilie ha müesse zeige. Die Bähnler hei Gottvertroue.

Apropos Söischwänzlizug, jedes Ortschäftli wird berücksichtiget im Bündnerland. E g’wüssi Zyt isch luschtig, de ermüedend un am Schluss isch me froh, wenn’s im nächschte Zug e Spyswage mit Kafi het.

Das isch ganz e guete Plan g’sy u er isch ufg’gange. Zwar isch der Spyswage e halbe Chüehlschrank, aber d Verpflegig isch guet. So churz vor Züri g’seh n i, wie bedeckt der Himmu isch. Das chönnt hinech no es Donnerwätter gäh.

Gäge Bärn zue tuet es de wieder uf u um Zügli gäge Buchsi schynt d Sunne.

Es guet’s Heicho isch das. Speter am Abe isch es de o bedeckt.