18.5. Arrivo
Sowohl der Parkplatz, aus o ds Biliee si längschte zahlt.
U itz also los! I mache hüt e halbi Wältreis a ds Ändi vo der Schwiz: Le Prese.
Bärn; – i cha mi nid erinnere, dass im Bahnhof nid bboue wär worde. Das muess es Jahrhundertwärch gäh.
Bärn u Züri si düre. Itz juflet der Zug i Richtig Sargans. Bis Züri ha n i chley pfuuset, itz luege n i der See a u lose mine Mitreisende zue. Viu si vornähm liisli. Es chlyses Ching tuet si Unwille kund. Mir gägenüber hocket eine, wo sech mit Bier u Nüssli verpflegt u duurend vor sech häre redt. Was ihm dür e Chopf geit, chunnt bim Muu use. D Ichoufslischte, dass me ds Ching sött abstelle, sämtlechi Ortschafte … Nu ja, es git allergatig Lüt uf dere Wält!
Uii, es Görbsli Bierduft, e nöii Hand voll Nüssli es Süfzge u ständigs Brable, – mis Gägenüber mit Guldchetteli het äuä Sorge. Tum Glück cha n i mi i der Tolino-App vertiefe.
Ab Chur ha n i viel Platz, aber uf der lingge Site. Miner ‚Nachbere‘ si Japaner u hei meh Glück, si g’seh der Landwasserviadukt u fötele wie wild.
Dür wildromanrisch’s Bündnerland geit es gäge Reichenau, de Thusis, Tiefecastel, Filisur gäge Samedan zue.
Der Albula-Chertunnel mahnt mi a Geografiestunde. Es isch scho idrücklech, was die Bahnbouer da a der RhB g’leischtet hei. Im Nu si mer dobe u vo Preda faht der Albulatunnel a. Si boue, im Vierezwänzgi sött der Tunnel nöi si.
Ds Samade muess i umstige u ds Pontresina no einisch. Ja de halt.
Ab itz ha n i der Söuschwänzliexpress. A allne mügleche u unmügleche Orte wird g’halte. Meischtens «uf Verlange»…
D Landschaft hie glycht eme Garte. O im gröschte G’nuusch het es usepützerleti Egge. D Täler si töif, d Häng stotzig. Das wird mer de es Wandere gäh. 😉
U plötzli bi n i z Le Prese. Ds Bähnli fahrt über d Houptstrass u der Bahnhof isch o dert. I stige us u d Zöllner stige i. Füfzg Meter u i bi im Albergo Lardi. Tja, das Huus het o scho einiges erläbt u g’seh. Aber egal, o ds Zimmer bewohne n i nid als erschte. Ichecke, lüfte, uspacke u afe einisch acho.
Später, so ha mer vorg’no, loufe n ig a See ache, oder übere. Es wulchnet veiechly. Vieri g’sy, i beschliesse, das Seeli z umrunde. Das bruucht mi zwar, u ohni grossi Rägetröpf geit es o nid. Aber zum Znacht bi n i wieder ume u g’niesse Spargle.
.
No chley Büro u de ab i das Bett.
