16.7. Uf d Klewenaup, de zur Bärefalle u i Ahorn zur Brise u zur Stockhütte
Postauto: Emmetten – Beckenried Post (mit Verspätig, d Chauffeuse het nid chönne fahre, wie si het wöue)
Seilbahn: Beckenried – Klewenalp (d Verspätig würkt sech us, 20 Min. warte bis zur nächste Bärgfahrt.)
Viertu nach Zähni, i bi dobe. (Klewenalp: da häre ha n i eini vo de erschte Schueureise gmacht. Dallewil, uecheloufe bis uf d Klewenalp. Mach das mau mit Füft- u Sächstklässler vo hüt u mit hütige Eutere hingerdrann. Dä Tippu isch denn länger g’si aus mine hüt.)
Klewenalp: Aues vernäblet – loufe los – d Sunne chunnt, füf Minute später: es tröpfelet chlei. 😉 hört aber grad wieder uf. (Ufstah, d Chrone richte u witer loufe)
Ig stune, wie di Landschaft hie verschandlet isch. Es het bau meh Schiliftmaschte aus Böim. Das Gebiet hie isch touristisch ‚erschlosse‘. Überau si breiti Wäge boue worde. Bi jedem Auphüttli steit e 4WD u uf de Schotterpischte si motorisierti Biker ungerwägs. Erstunlech, was die Natur so aues muess ushaute.
Die Infrastruktur wird aber hüt vo wenige g’nützt. (Guet, i wet nid es wär angersch.) Z Fuess triffe n i paar wenegi (chönnt se a eir Hang abzeue). Uf em Velo si scho meh u die meischte fahre e Chare u hei Überchleider anne.
Wo n ig geschter planet ha, isch d Ussicht uf guet’s Wätter hüt no chli waggelig g’si. Drum ha n i mehreri Müglechkeite i ds Out g’fasst.
-
- Uf d Klewenalp ueche, u grad wieder umchere
- Uf d Klewenalp ueche u wieder ache loufe
- Uf d Klewenalp ueche u über ds Tannibüehl diräkt zur Stockhütte
- Uf d Klewenalp ueche zur Bärefalle zum Brisehuus, i ds Tannlibüehl u zur Stockhütte
oder äbe, was i g’macht ha, no mit eme Schwänker über Brändlisbode u Morschfäld. Zum Zmittag bi n i ir Bärefalle, e wunderbare Grat mit leider nume näbliger Ussicht.. Schad het es kener Bäre meh. Hie zweigt o der Wäg uf die legendäri Muesenalp ab. (Der Musenalp-Express hei mer aube im Semer g’läse.) Vo der Bärefalle geit es nidsi gäge Ahorn zue. Dert jagd mi e Horde Guschti, wo zersch läng luege, de langsam uf mi zue chöme u plötzli öppe z zwänzg i me Galopp uf mi los presche. Was die hei wöue, weiss i nid. I ha ne de müesse d Stäcke zeige, dass si g’stoppet hei. Übergangslos hei si afa möööögge. Hunger? -Aber si hei ja Gras. Durscht? – Es het g’nue Wasser. Längwili? Blöödi? – Nu ja, si allei wüsse’s.
Vom Ahorn zur SAC Brisehütte ueche muess i vei chiche. Es isch stotzig! Mängisch bi n i im Näbu, mängisch tröpfelet’s, de tuet’s wieder uf, d Sunne schint düre u drufache muess me wieder es Jäggli a lege. Aber es isch fasch mystisch. Ussert ere Grossmuetter wo mit eme Büebu tuet der Wanderwäg vo Chüehplätter putze g’seh n i ke Mönsch. Bir Brisehütte het’s de Sennelüt u öppe bim Sätteli chunnt mer e jungi Familie z Fuess egäge.
Ds Sätteli g’seht öppe us wie d Bärefalle. E Krete, e Mulde, rächts u linggs geite obsi u vor u hinger nidsi wie d Sou. Vom Sätteli a get’s für mi nume no nidsi, – zersch wieder i ds Tannibüehl, de gäge d Twärregg u schliessli zur Stockhütte. Der letscht Bitz, mit em Gondeli, g’niesse n i. 
Beckeried (436m) – Klewenalp (1593m) – Brisehus (1772m) – Tannibüehl (1526m) – Twäregg (1498m) – Stockhütte ( 1279m) – Emmette (754m)
Totali Dischtanz: 16,354 km – Totali Zyt: 5h40min – Durchschnittlechi G’schwindigkeit: 2,8 km/h (isch äbe ds Höckle o i g’rächnet) 😉😉
Itz bi n i wieder wohubehalte im Hotäu u gah itz gah Znacht ässe.
